Консерватория жаңалықтары

«Цинандали классикалық музыка фестивалінің» ұйымдастырушылары (Грузия) Қазақстандағы 18-28 жас аралығындағы талантты жас музыканттар арасында Пан-Кавкадық жастар оркестріне (PCYO) қатысу үшін тыңдау байқауын жариялап отыр. Тыңдау байқауы 2020 жылдың 7 наурызында Құрманғазы атындағы Қазақ ұлттық консерваториясы ның Камералық залында өтеді.

Қазақстанмен қатар, тыңдауға Кавказ өңіріндегі елдерден (Грузия, Армения, Әзірбайжан), Украина мен Түркиядан жас музыканттар қатысып жатыр. Іріктеуден өткендер дүниежүзіне әйгілі дирижер Джанандреа Нозеда жетекшілік ететін Пан-Кавказдық жастар симфониялық оркестрінің құрамында өнер көрсетпек. Оркестр 2020 жылдың қыркүйегінде Грузияның Цинандали қаласында өтетін фестивальдің резидентіне айналады.

2020 жылдың 24 қаңтарында Құрманғазы атындағы Қазақ ұлттық консерваториясында «Жаппай ашық онлайн-курстар: дайындау, алға жылжыту және қолдану» тақырыбында әдістемелік семинар өтті.
Семинардың мақсаты: консерваторияда жаппай ашық онлайн курстар туралы ақпарат беру, бұл курстардың ЖОО оқу процесіне қалай көмек көрсете алатынын көрсету.
Семинарға консерваторияның декандары, кафедра меңгерушілері және профессор-оқытушылар құрамы қатысты.

2019 жылдың 21 қаңтарында Құрманғазы атындағы Қазақ ұлттық консерваториясында  Республикалық оқу әдістемелік кеңес мәжілісі аясында «Музыкалық өнер саласында кәсіби білім беру» атты семинар өтті. Жиынға бірқатар музыкалық орта білім беретін мектеп-колледждердің өкілдері қатысты. Атап айтқанда А.Жұбанов атындағы дарынды балаларға арналған Республикалық қазақ орта мамандандырылған музыка мектеп-интернаты директорының оқу ісі жөніндегі орынбасары Н.Қ.Жырғаланова, музыка ісі жөніндегі орынбасары С.А.Оспанкулова, К.Байсейітова атындағы дарынды балаларға арналған Республикалық мамандандырылған музыкалық орта мектеп-интернаты директорының оқу ісі жөніндегі орынбасары М.С.Мусрепова, П.И. Чайковский атындағы Алматы музыкалық колледжі директорының оқу және оқу-әдістемелік жұмысы жөніндегі орынбасары Г.С.Балпанова, оқу-әдістемелік бірлестігі жөніндегі орынбасары А.Б.Сарманова және Ж. Елебеков атындағы Республикалық эстрада және цирк колледжінің оқу ісі жөніндегі меңгерушісі С.А.Бегалина.
Күн тәртібінде қаралған негізгі үш мәселе: музыкалық орта білім беретін оқу орындарындағы мамандарға деген сұраныс (мамандықтар бойынша); Құрманғазы атындағы Қазақ ұлттық консерваториясына жаңа білім беру бағдарламаларын ашу қажеттілігі туралы; жоғары және орта музыкалық  оқу орындарының білім беру бағдарламаларының сабақтастығы туралы.

Кездесуде кәсіби музыкалық білім берудегі басты мәселелер, мектеп-колледж-ЖОО арасындағы сабақтастық және оқу процесіндегі ерекшеліктер, оқу жоспарларын реттейтін нормативтік құжаттарды әзірлеудің маңыздылығы атап өтілді. Республикалық оқу әдістемелік кеңес мәжілісі аясында мамандар жоғарыда айтылған әр тақырып бойынша жеке-жеке тоқталып, өз ойларын ортаға салып, мәселені жан-жақты қарастырды.
Семинар қорытындысы бойынша жуырда осы мәселелерді жетілдіру және мазмұны бойынша кейбір пәндердің қайталануын болдырмау мақсатында, білім беру деңгейлері бойынша оқу бағдарламаларына талдау жүргізілетін болды.

2020 жылдың  23 қаңтарында, сағат 12:00-де Құрманғазы атындағы Қазақ ұлттық консерваториясының мәжіліс залында ойшыл ақын, ағартушы Абай Құнанбайұлының 175 жылдық мерейтойын атап өтуге байланысты, «Абай және XXI ғасырдағы Қазақстан» атты президент мақаласы бойынша философия ғылымдарының докторы, Ұлттық ғылым академиясының академигі Ғарифолла Есімнің онлайн дәрісі өтетінін хабарлаймыз.
Құрметті ұстаздар мен қызметкерлер, осы онлайн дәріске қатысуларыңызды сұраймыз.
Өткізу уақыты: 23 қаңтар, сағат 12:00.

Бүгін  Құрманғазы атындағы Қазақ ұлттық консерваториясының мәжіліс залында Президентіміз Қасым-Жомарт Кемелұлы Тоқаевтың Абай Құнанбайұлының 175 жылдығына орай жарияланған «Абай және XXI ғасырдағы Қазақстан» атты мақаласын талқылауға арналған «Абай мұрасы және қазіргі заманғы Қазақстан» тақырыбындағы дөңгелек үстел өтті. Жиынға консерватория басшылығы мен профессор-оқытушылық құрамы және бірқатар қонақтар қатысты.

Биыл Абай Құнанбайұлының туғанына 175 жыл толады. Халқымыздың ұлы перзентінің мерейтойын лайықты атап өту үшін арнайы құрылған комиссия дайындық жұмыстарын бастап кетті. Мемлекет көлемінде және халықаралық деңгейде ауқымды іс-шаралар ұйымдастыру жоспарланып отыр. Бірақ мұның бәрі той тойлау үшін емес, ой-өрісімізді кеңейтіп, рухани тұрғыдан дамуымыз үшін өткізілмек.

2020 жылдың 6-қаңтарында Құрманғазы атындағы Қазақ ұлттық консерваториясының мәжіліс залында ғылыми кеңес отырысы өтті. Жиын барысында Қазақстан Республикасының Білім және ғылым министрінің Құрмет грамотасымен консерваториямыздың бірқатар ұстаздары марапатталды. Марапат иелері қатарында «Домбыра» кафедрасының доценті Жұмағали Қуаныш Ізімұлы, «Музыкалық білім беру және психология» кафедрасының аға оқытушысы Қожамжарова Күләш Өмірзаққызы, осы кафедраның оқытушысы Алшымбаева Айгүл Бақытжанқызы және концертмейстерлер, Скрипченко Елена Анатольевна, Көкубаева Ләйлә Малдыбайқызы, Косаманова Гульназ Гаяновна, Зыкеева Татьяна Сергеевналар бар. Сонымен қатар консерватория ректоры Арман Әділханұлының Алғыс хатына зейнеттегі ардагер ұстаз Баяхунов Бакир Яхиянович пен «Қобыз және баян» кафедрасының аға оқытушысы Жүнісова Балжан Бекенқызы ие болды. Марапат иелерін құттықтаймыз.

Қазақстан Республикасы Білім және ғылым министрлігі Жоғары және жоғары оқу орнынан кейінгі білім департаменті студенттердің әлеуметтік ахуалын  анықтау мақсатында 2019 жылдың 25-желтоқсанына дейін онлайн форматта сауалнама жүргізеді.

Сауалнамаға қатысу үшін төмендегі сілтемеге өтіңіз.
https://docs.google.com/forms/d/e/1FAIpQLSeXg43rzDghzxHSJRxER-p_mqbLIaZ3P9Nfw_I56G7DLtCtCg/viewform

Қазақстан Республикасы Білім және ғылым министрлігі Жоғары және жоғары оқу орнынан кейінгі білім департаменті ЖОО-дағы жемқорлық фактілерін анықтау мақсатында 2019 жылдың 18-27 желтоқсан аралығында студенттер арасында жасырын сауалнама жүргізеді. Сауалнамаға 3-курс студенттеріне қатысу міндетті. Қалған курс студенттері ерікті түрде қатыса алады.

Сауалнамаға қатысу үшін төмендегі сілтемеге өтіңіз.
https://forms.gle/XPuVR7uafAw3hSvr8