Бибігүл Төлегенованың XI Халықаралық вокалистер байқауында студенттеріміз үздіктер қатарынан көрінді

2021 жылдың 12-қазанында Нұр-Сұлтан қаласында Халық артисі Бибігүл Төлегенова атындағы XI Халықаралық вокалистер байқауы өз мәресіне жетті. Консерваториямыздың 4 курс студенті Көшкінбаев Дінмұхамед (ұстазы, аға оқытушы Бекназарова Т.К.) байқаудың Бас Жүлдесін иеленсе, Мұхамедияр Ораз (ұстазы, аға оқытушы Байнешова Ж.Б.) 3-орын лауреаты, ал 4-курс студенті Мария Медетова (ұстазы Смольянина Е.В.) байқау дипломанты атанды. Сондай-ақ аталмыш байқауда  "Фортепиано" мамандығының 4 курс студенті Ғимарат Ерназар (ұстазы, прфессор Массовер С.А.)«Үздік концертмейстер» атанды.


Жыл сайын өтетін айтулы байқауда Ресей, Өзбекстан, Қырғызстан және елімізден 60-тан аса өнерпаз бақ сынап, 15 қатысушы жүлдегер атанды. Бибігүл Ахметқызы: «Байқауға келген 60 адамның бәрін тыңдадық. Үндері әсем, бәрі де мықты. Талап бойынша 12 қатысушыны таңдауымыз керек болған. 15-ін іріктеп алдық. Себебі шынында бос жіберуге қимадық. Байқау өте үлкен деңгейде өтті. Бұл балалар тоқтап қалмауы керек. Біз салып берген даңғыл жолға адаспай түсіп, қанат қаға берсе екен.» - деп, жас өнерпаздарға өз ықыласын білдірді.

Консерваториямыздың мерейін көтеріп, жоғары деңгейде өнер көрсеткен студенттеріміз бен оларды тәрбиелеген ұстаздарымызға алғыс айтып, одан да жоғары шығармашылық табыстарға жете берулеріне тілектестік білдіреміз.