«Қазақи дүниетаным» тақырыбында кураторлық сағат өтті
2023 жылдың 8 қарашасында консерваторияның А.Жұбанов атындағы концерттік залында Тәрбие және әлеуметтік жұмыстар жөніндегі проректор Ешмұханов Мұхамбет Ашхатұлының ұйымдастыруымен кураторлық сағат өтті.
Алматы қаласы Дін істері жөніндегі басқармасының ақпаратты түсіндіру тобының мүшесі, дінтанушы-магистр Абдрахманов Сұлтан Мұрзахметұлымен бірге «Қазақи дүниетаным» атты қонақтық дәріс өтті.
Кураторлық сағат барысында Абдрахманов Сұлтан Мұрзахметұлы бүгінгі қоғамымыздағы аса бір өзекті де, күрделі мәселелердің бірі – жастардың, жалпы халқымыздың дінге деген көзқарасы, дүниетанымы екендігін тілге тиек етті. Тарихтан мысалдар келтіріп, еліміздің, жалпы қоғамымыздың ең жанды жерінің бірі – дін мәселесі екендігін сауатты түрде түсіндіріп берді. Сондай-ақ, қонағымыз Кеңес үкіметі ыдырағаннан кейінгі саяси, діни ахуалдарға талдау жасай отырып, соңғы уақыттардағы діни ағымдардың статистикалық мәліметтеріне де тоқталып өтті. Тарихы терең, тағылымы ерен қазақ халқының діни дүниетанымы дегенде, ең алдымен оның ұлттық сал-дәстүрлерден бастау алатындығын айтты.
Кураторлық сағаттың студенттерге қызықты болғандығы сөз соңындағы сұрақ-жауаптар кезінде түсінікті болды. Спикеріміз қойылған сұрақтарға жастарымызға үлгі болар мысалдармен әрі жан-жақты мәліметтермен тыңғылықты жауап берді.
