«Қазақстан менің жүрегімде. Коган музыкалық әулетіне арнау» атты кітап оқырманға жол тартты

2023 жылдың 11 қазанда консерваторияның мәжіліс залында «Қазақстан менің жүрегімде. Коган музыкалық әулетіне арнау» атты кітабының тұсаукесер рәсімі болып өтті.

Аталмыш кітап XX ғасырдағы Қазақстанның көрнекті музыканттары, еліміздің фортепианолық, скрипкалық, ансамбль-концертмейстерлік мектептерінің негізін қалаушылар, Коган әулетінің мүшелері - Ева, Иосиф және Семен Когандарға арналған.

Айтулы іс-шара барысында сахна төріне көтерілген ҚР Халық артисі, профессор, еңбек ардагері Баяхунов Бәкір Яхиянұлы мен Құрманғазы атындағы Қазақ ұлттық консерваториясы ректорының міндетін уақытша атқарушы Әбдірахман Гүлнар Бақытқызы кітаптың лентасын салтанатты түрде қиып, еңбек көпшілік оқырманға жол тартты.

Кітапты құрастырып, баспа бетінен жарыққа шығуына себепкер болған-ҚР Білім беру саласының Құрметті қызметкері Раушан Юсупова мен Халықаралық байқаулардың лауреаты Ерназар Ғимарат болса, бас редакторы «Art Forum of Kazakhstan» халықаралық шығармашылық бірлестігінің Халықаралық қатынастар жөніндегі директоры Алмагүл Қонысбаева.

Тұсаукесер рәсімі соңында Ева Коганның ұлы Евгений Бычков іс-шараға Канададан онлайн қосылып, қатысушыларға өз құттықтауы мен сәлемін жолдады.