«Арт-менеджмент» кафедрасы және ЮНЕСКО Клубтарының Федерациясы

Жақында Құрманғазы атындағы Қазақ ұлттық консерваториясында «Арт-менеджмент» мамандығы бойынша білім алып жатқан студенттер еріктілер ретінде ЮНЕСКО қамқорлығымен ұйымдастырылған «The Planet of ART 2022» атты Халықаралық фестивалдің көркемдік циклін өткізуге атсалысқандықтары үшін Қазақстандық Ұлттық ЮНЕСКО Клубтарының Федерациясы (ҚазҰЮКФ) атынан жоба ұйымдастырушыларының алғыс хаттарымен марапатталу құрметіне ие болды.

ҚазҰЮКФ Президентінің кеңесшісі Сабина Ақжарова жобаны жүзеге асыруға белсене атсалысып, еліміздің жетекші шығармашылық оқу орнының қабырғасында студенттерді жақсы дайындағаны үшін Құрманғазы атындағы Қазақ ұлттық консерваториясы басшылығына және «Арт-менеджмент» кафедрасының меңгерушісі С.С.Қалиевке ризашылығын білдіріп, алғыс хаттар мен альбом-кітап табыстады.

Фестивальдің Гала-концерті 29 қыркүйек күні М.О.Әуезов атындағы Қазақ ұлттық драма театрында өтті. Фестивальдің ашылу салтанаты қатысушы-лауреаттардың картиналар көрмесімен ерекшеленді. Шара барысында «The Planet of ART 2022» финалистерінің 500-ге жуық жұмыстары қамтылған «Жібек жолының мұрасы» тақырыптық альбомы таныстырылды.

Жоба жеңімпаздарын салтанатты марапаттау рәсімі биылғы фестивальдің музыкалық циклі өнерпаздарының керемет қойылымдарымен сүйемелденді. Гала концертке жиналған көрермендер шығармашыл жастардың өнеріне тәнті болды.

Студенттеріміздің алдағы уақытта да ірі жобаларда бой көрсетіп, соның ішінде Қазақстандық Ұлттық ЮНЕСКО Клубтарының Федерациясы ұйымдастыратын жобаларда өздерін жан-жақты танытатындықтарына сеніміміз мол!