Қайғылы хабар жеткіземіз

Құрманғазы атындағы Қазақ ұлттық консерваториясының профессоры, Қазақстанның еңбек сіңірген артисі, ұлағатты ұстаз, қобызшы Мерует Кабекенқызы Каленбаева дүниеден озды.

Мерует Кабекенқызы 1939 жылы 9 маусымда Орал облысы, Орда ауданында дүниеге келген. Ол кәсіби қобыз мектебінің негізін қалаушылардың бірі ретінде қобыз үнінің ерекшелігін жоғалтпай, аспапты дамытып, қасиетті өнердің мәртебесін арттыра отырып, бүгінгі күнге дейін қызмет атқарды.

Еңбек жолын әлемге әйгілі Құрманғазы атындағы Академиялық ұлт аспаптар оркестрінде қобызшылар тобының концертмейстері ретінде бастаған. 1966 жылдан бастап  Құрманғазы атындағы Қазақ ұлттық консерваториясында қызмет етті. 1980-2000 жылдар аралығында Халық аспаптар факультетінің деканы ретінде үлкен абыроймен қызмет атқарды. Мерует Кабекенқызының талантты шәкірттері кәсіби орындаушылық деңгейлерімен танымал болып, нәтижелі ұстаздық жұмыстарының арқасында еліміздің әр аймағында өз жетістіктерін көрсетіп жүр.

Ажары мен ақылы, білімі мен мінезі қатар өрілген сұлу мүсіні мәңгі жадымызда сақталады.