«Базарғали Жаманбаев. Құпияны сақтаушы» мақалалар жинағы жарық көрді

Құрманғазы атындағы Қазақ ұлттық консерваториясында белгілі дирижер-хормейстер, дарынды музыкант, ҚР Халық артисі, Мемлекеттік сыйлықтың лауреаты, Құрманғазы атындағы ҚҰК «Дирижерлеу» кафедрасының меңгерушісі, Республиканың дирижерлік өнерін дамытуға елеулі үлес қосқан профессор Базарғали Әжиұлы Жаманбаевқа арналған «Базарғали Жаманбаев. Құпияны сақтаушы» мақалалар жинағы (құрастырушы, жауапты редактор А.С. Нүсіпова) жарық көрді.

Басылымда Б. Жаманбаевтың Құрманғазы атындағы Қазақ ұлттық консерваториясындағы және ТМД-ның басқа да жетекші музыкалық мекемелеріндегі әріптестерінің очерктері және оның басшылығымен жүзеге асырылған опералық қойылымдар туралы пікірлер, сондай-ақ шәкірттерінің мақалалары бар. Олар маэстроның шығармашылық келбетін қалыптастырған дүниелерді, оның концерттік-орындаушылық, педагогикалық, қоғамдық және ұйымдастырушылық салаларды қамтитын көп қырлы және жемісті қызметін ашады.

Кітап шығармашылық зиялы қауымның кең ауқымына арналған. Оның материалдары музыкалық білім берудің әртүрлі буындарында қолданыла алады, сондай-ақ ғылыми және ағартушылық қызметте де сұранысқа ие болады деп сенеміз.