Белгілі актриса Шәмшәгүл Меңдиярова консерватория студенттерімен кездесті

2022 жылы 23 қараша күні консерваторияның Е. Рахмадиев атындағы үлкен концерт залында кураторлық сағат аясында өнер-білім ордасы студенттерімен Қазақстанның еңбек сіңірген артисі, Мұхтар Әуезов атындағы Қазақ мемлекеттік академиялық драма театрының актрисасы Меңдиярова Шәмшәгүл Мырзабекқызымен кездесу өтті.

Сөзін өнер дегеніміз не, деген сұрақтан бастаған қонағымыз: «Әрбір адамның жүрек түкпірінде бір сиқыр бар секілді. Бұл ғажайып сырға толы сандықта неше түрлі армандар, мақсаттар бар десеңші! Ал бұл сандықтың ең түбінде немесе кейде жарық жұлдыздай алға шоқ етіп шығатын бір нәрсе бар. Бұл не деп ойлайсыздар? Бұл тамаша нәрсенің аты – өнер. Өнер – әр адамның бойындағы белгілі бір құдірет күші секілді. Өнер – менің өмірімнің үлкен бір бөлігі деп білемін. Өнерлі адам өрге жүзеді, демекші, өнердің құдіреттері арқылы әрқашанда биік шыңдарды бағындыратынымызға еш күмән жоқ екенін ұмытпаңыздар!» - деп, студенттермен өзінің өмір мен өнер жайлы терең пайымымен бөлісті. Сондай-ақ, Шәмшәгүл Мырзабекқызы жалпы өзінің шығармашылығы жайлы сөз қозғап, актерлік тәжірибесінде орын алған қызықты жайттарды әңгімелеп берді.

Жиын соңында студенттердің сұрақтарына жауап берген белгілі актриса: «Өнер жолы басқаларға өзіңді үнемі дәлелдеуді талап етеді. Бұл мамандықта артқа қарай шегіну жоқ. Бәйгеге қосқан жүйрік аттай үнемі өзіңді қамшылап тұру керексің» - деп, сыр-сұхбатын қорытындылады.