«Болашақ өз қолыңда» тақырыбында кездесу өтті

2023 жылдың 28 қарашасында консерваторияның А.Жұбанов атындағы концерттік залында Тәрбие және әлеуметтік жұмыстар жөніндегі проректор Ешмұханов Мұхамбет Ашхатұлының ұйымдастыруымен мотивациялық бағыттағы «Болашақ өз қолыңда» тақырыбында «Дарын» Жастар сыйлығының лауреаты Құрманғазы атындағы Қазақ ұлттық оркестрінің бас дирижері Тілепберген Абылай Жанболатұлымен кездесу өтті.

Келелі кездесуде Абылай Жанболатұлы студенттерге өзінің өмірі мен өнер жолы туралы айта келе: «Әркімнің өмір жолы әртүрлі, тағдыры да әр қилы болғандықтан адамның іс-әрекетіне қарай, өмір де өз ағысымен апарады. Жарқын болашақ құру ең алдымен тәрбие-тәлімнен, үлкен білімнің арқасында болатыны сөзсіз. Жарқын болашаққа қадам жасау кішкентай дүниелерден басталады. Жарқын болашақ деген не? Ол - білім алып, біліміңді оң іске салып соның қызығын жылдар бойы көру. Әрбір жақсының қайыры бар, сол себепті жақсы іспен айналысып болашағымызды өз қолымызға алғанымыз жөн. Бұл, әсіресе, жастарға үлкен үндеу. «Болашақ – жастардың қолында» деген қанатты сөз көптеген жастарымыздың алға ұмтылуына, мақсат қоюына, сол мақсатқа жетуге деген құштарлығының оянуына себепші болған ғажап бір асыл сөз. Яғни, жастарға ел сеніп отыр, үміт артып отыр. Осыны сезіне білсек, үмітті ақтай білсек, еліміз үшін бұл үлкен қуаныш» деп әріптес іні-қарындастарына деген жүрекжарды сөздерін жеткізді.