Философия (Phd) докторының дипломдары табыс етілді
2022 жылғы 27 сәуірде Құрманғазы атындағы Қазақ ұлттық консерваториясының Диссертациялық кеңесінің шешімімен «Аспаптық орындаушылық» білім беру бағдарламасы бойынша «Ішекті аспаптар» кафедрасының доценті Айжан Бекенова мен «Арт-менеджмент» кафедрасының оқытушысы Айгерім Оспановаға философия (Phd) докторы атағы берілді. Дипломдарды Құрманғазы ат. ҚҰК Диссертациялық кеңесінің төрағасы Сәуле Ысқаққызы Өтеғалиева табыстады.
Айжан Сләмқызы «Альттық репертуардағы транскрипциялар: тарихы, теориясы және тәжірибесі» деген тақырыптағы диссертациялық жұмысын сәтті қорғап шықты. Еңбек орыс тілінде жазылып, «Ішекті аспаптар» кафедрасында дайындалды.
Айжан Бекенованың ғылыми кеңесшілері өнертану кандидаты, қауымдастырылған профессор, оқу және оқу-әдістемелік жұмыстар жөніндегі проректор Гүлнәр Әбдірахман және өнертану кандидаты, профессор Панчо Владигеров (Болгария) атындағы Ұлттық музыка академиясының профессоры Эмилия Коларова болды.
Айгерім Маратқызы да «Дәстүрлі қазақ музыкасын айрықша арт-нарығы ретінде басқару: сараптама және даму болашағы» деген тақырыптағы диссертациясын сәтті қорғап шықты. Диссертация қазақ тілінде жазылып, «Арт-менеджмент» кафедрасында дайындалған.
Айгерім Оспанованың ғылыми кеңесшілері өнертану кандидаты, «Музыкатану және композиция» кафедрасының доценті Р.Жұманиязова және Сорбонна (Франция) университеті Ғылым және өнер департаментінің басшысы, профессор Ольга Киселева болды.
Біз әріптестерімізді ғылыми атаққа ие болуларымен құттықтаймыз және алда да шығармашылық табыстар тілейміз!