«Хассақ» этно-фольклорлық ансамблінің концерті өтті

2023 жылдың 6 желтоқсанында консерваторияның Е.Рахмадиев атындағы Үлкен концерт залында «Хассақ» этно-фольклорлық ансамблінің концерті болып өтті.

«Хассақ» ансамблінің орындауындағы шығармалар көркемдік жағынан өте бай әрі әрбір тыңдарманның жүрегінен жол табатын дүние. Тарихының тамыры тым тереңде жатқан халқымыздың сарыны мен қазақтың төл аспаптарын керемет шеберлікпен үндестіре білген, талайдың таңдайын қақтырып, ұлттық музыканы жаңғыртып жүрген өнерпаздар бұл күнгі кеште көрерменнің зор қошеметіне бөленді.

Концерттік бағдарламада «Тойбастар», «Тұран жолбарысы», «Құс базары», «Аққу би», «Кемел адам», «Аралым толғау», «Туған жер», «Аңсау», «Аманат» секілді көптеген туындылары шырқалды.