Кітап ордасындағы Жаңа жыл!

2022 жылғы 31 наурызда Ұлттық кітапханада жаңару мен жаңғырудың символы болған Ұлыстың ұлы күні – Наурыз мейрамына арналған мерекелік іс-шара өтті.
Іс-шараны «Қазақ» радиосы мен «Шалқар» радиосының Алматы студиясының жетекшісі, «Құрмет» орденінің иегері, ақын, журналист Бақыт Жағыпарұлы жүргізді.
Алғашқы сөз алған кітапхана директоры Б.Қ. Оспанова барша жиналған қауымды Наурыз мейрамымен құттықтап, жылы лебізін білдірді.
Мерекеге келген құрметті қонақтардың қатарында Алматы қаласы әкімдігі Мәдениет басқармасы басшысының орынбасары Д.А. Әлиев, Қазақстан Жазушылар одағы Басқарма төрағасының орынбасары Б. Жақып, Қазақстан Діни басқармасы төрағасының орынбасары, наиб-мүфти К.Қ. Мырзабаев, Қазақстан кинематографистер одағының төрағасы, кинорежиссер Е.К. Тұрсынов, Ұлттық киноны қолдау мемлекеттік орталығы Басқарма төрағасының орынбасары, продюсер Қ.Ә. Төребай, Қазақстандық салалық мәдениет, спорт, туризм және ақпарат қызметкерлерінің кәсіптік одағының Алматы қалалық филиалының төрайымы С.Н. Нұрғалықова және БАҚ өкілдері болды.
Мерекелік құттықтау сөз алған Бауыржан Жақып Қазақстан Жазушылар Одағы басқармасының атынан Ұлттық кітапхана директоры Б.Қ. Оспанованы «Кітапхана аруы - Мiss Library» төсбелгісімен марапаттап, Жазушылар Одағы басқарма төрағасы Ұлықбек Есдәулет қол қойған сертификатты салтанатты түрде табыс етті.
Мерекелік шара концерттік бағдарламамен жалғасып, Құрманғазы атындағы Қазақ Ұлттық консерваториясының өнерпаздары, «Кәусар» жетігеншілер ансамблі, «Долан» ұйғыр би ансамблі және Қазақ-түрік лицейінің домбырашылары өнер көрсетіп, киелі домбырадан төгілген күмбірлеген күй мен мың бұралған биішілер көпшілікті өнерлерімен тәнті етті. Сондай-ақ, іс-шара барысында қонақтарға наурыз көже жəне басқа да ұлттық тағамдар ұсынылды.
Мерекелік ақ тілегін жеткізіп, өнерпаз шәкірттерінің шараға қатысуына мұрындық болып, ән мен жырға бөлегені үшін консерватория ректоры Арман Әділханұлы Жүдебаевқа және өнерпаздарға Ұлттық кітапхана ұжымы атынан шынайы ризашылық білдіріліп, Алғыс хат табыс етілді. Онда Ұлттық кітап ордасының ұжымы консерватория басшысы мен ұжымына зор денсаулық, шалқар шабыт және зор шығармашылық табыстар тілеген.