Композитор Бәкір Баяхуновпен шығармашылық кездесу өтті

5 қазанда консерваторияның мәжіліс залында ҚР Халық артисі, композитор, профессор Бәкір Баяхуновпен шығармашылық мерейтойлық кездесу болып өтті.

Іс-шараны Бәкір Баяхунов ұзақ жылдар бойы қызмет еткен «Музыкатану және композиция» кафедрасы ұйымдастырды. Қазақстан композиторлар мектебінің корифейін шәкірттері әрі кіші әріптестері Гүлжан Үзенбаева, Артық Тоқсанбаев, Ольга Хромова, Бейбіт Дәлденбай және Ермек Өміров және өзге де заманауи музыка өнерінің майталмандары арнайы құттықтады. Олар маэстроның оркестрлеу, аспаптау және композиция сабақтарынан алған баға жетпес білімдерін үлкен ризашылықпен еске алды.

Кеш қонақтары мен консерватория студенттеріне Бәкір Яхиянұлы шеберлік сабағын өткізіп, музыкалық шығармамен жұмыс істеу қағидалары тақырыбында әңгіме өрбітті. Жүздесу аясында айтылған қызықты идеялар мен тәжірибе алмасу мүмкіндігі кеш қонақтары тарапынан көптеген сұрақтар тудырып, оларға композитор құшырлана жауап берді.

Бәкір Яхиянұлын мерейтойымен тағы бір мәрте құттықтай келе өнер-білім ордасына арнайы келіп өткізген кездесуі үшін зор алғысымызды білдіреміз. Ұзақ ғұмыр мен сарқылмас шығармашылық шабыт тілейміз!