Консерватория докторанты Республикалық «ЖасSTAR Grants Program» байқауының жеңімпазы

Құрманғазы атындағы Қазақ ұлттық консерваториясының «Арт-менеджмент» мамандығының 1-курс студенті Тоғжан Молдалім Нұрсұлтан Назарбаев Қорының Шығармашыл жастардың «ЖасSTAR» Халықаралық фестивалінің аясында өткен республикалық «ЖасSTAR Grants Program» байқауының он жеңімпазының бірі атанды.

Аталған байқау мәдениет пен өнердің жас қайраткерлерін, сондай-ақ мәдениет пен өнер, дизайн, сән және шығармашылық кәсіпкерлік саласында қызметтерін жүзеге асырып жүрген суретшілердің, креаторлардың, шығармашылық бірлестіктер мен ұйымдардың жобалары мен жұмыстарын қолдауға бағытталған.

Талантты жастардың шығармашыл жобаларын жүзеге асыруға арналған гранттардың «ЖасSTAR Grants Program» республикалық байқауы 2022 жылғы 1 шілде мен 18 қыркүйек күндері аралығында өтті және ол үш сатыға бөлінді. Байқау комиссиясына 400-ден астам сұраным келіп түскен, алайда екінші турға небәрі 32 жоба ғана өтті. Екінші сатының финалшылары өз идеяларын Нұрсұлтан Назарбаев Қорының жанындағы Мәдениет жөніндегі кеңес өкілдерінен құралған қазылар алқасының таразысына бетпе-бет форматта, Алматыда ұсынды. Байқау шарттары бойынша 10 жоба анықталып, олардың авторларының әрқайсысына екі миллион теңге көлемінде Қордың гранттары табыс етілді.

Тоғжан Молдалім өз жобасын ғылыми-шығармашылық "Qazaq Ballet" зертханасындағы қызметі аясында, сондай-ақ Қазақстан хореографиялық өнері саласындағы арт-менеджментке арналған өзінің болашақ диссертациялық зерттеуі аясында жүзеге асыруды жоспарлап отыр.

Т. Молдалімді, Арт-менеджмент кафедрасын осындай табыстарымен құттықтаймыз және жобаның озық түрде жүзеге асуын тілейміз!