Консерватория ректоры А.Жүдебаев бастаған делегация Ташкенттік әріптестерін мерейтойларымен құттықтап қайтты

2022 жылдың 9-11 маусым күндері аралығында Өзбекстанда Өзбек Мемлекеттік консерваториясының 85 жылдық мерейтойын мерекелеуге арналған ауқымды іс-шаралар өтті.

Осы салтанатты күндері Ташкентте халықаралық ынтымақтастықты нығайтуға арналған көптеген стратегиялық маңызы зор уақиғалар болды. ШЫҰ-на мүше мемлекеттердің жоғары музыкалық оқу орындары ректорларының бірінші форумының пленарлық мәжілісі үйлесімді түрде Ташкент декларациясына қол қою салтанатына ойысты. Оған белгілі музыкалық өнер және мәдениет қайраткерлері қатысты. Олардың қатарында П.И. Чайковский атындағы Мәскеу мемлекеттік консерваториясының ректоры А.С. Соколов, Н.А. Римский-Корсаков атындағы Санкт-Петербор консерваториясының ректоры А.Н. Васильев, Әзірбайжан ұлттық консерваториясының ректоры Сияуыш Керими, Тегеран музыка консерваториясының президенті Dr. Behzad Moafi, Белорус мемлекеттік музыка академиясының ректоры Е.В. Куракина, Қазақ ұлттық Өнер университетінің ректоры А.Қ. Мұсақожаева, Құрманғазы атындағы Қазақ ұлттық консерваториясының ректоры А.Ә. Жүдебаев, Тәжік ұлттық консерваториясының ректоры Мирали Достизода, Түркімен ұлттық консерваториясының Р.Х. Амангельдыев, Қырғыз ұлттық консерваториясының ректоры М.А. Бегалиев бар.

Өзбекстан Мемлекеттік консерваториясының Үлкен залында өткен классикалық музыка концертінің сахнасына осы заманғы көрнекті музыканттар жиналды. ҚР Халық артисі, әлемге әйгілі скрипкашы Айман Қожабекқызы Мұсақожаева, Өзбекстан Республикасының Еңбек сіңірген артисі Камолиддин Турдымуратұлы Уринбаев, Ресейдің Еңбек сіңірген артисі Алексей Николаевич Васильев, Өзбекстан Республикасының Еңбек сіңірген артисі Сайера Гафурова және Өзбекстанның Мемлекеттік симфониялық оркестрі С. Рахманиновтың 3-симфониясын орындап, Л. Бетховеннің скрипкаға, виолончель мен фортепианоға арналған концертін орындады. Музыканттардың кәсіпқойлығы мен жоғары орындаушылық деңгейі тыңдарман аудиториясын тәнті етті.

Өзбекстан Мемлекеттік консерваториясының кіреберісінде өткен Open-air концерті өзінің безендірілуінің айшықтылығымен, ұйымдастырудың жоғары деңгейімен және репертуарды іріктеу, орындалып жатқан туындылардың ұлттық нақышымен, дәстүр мен жаңашылдықтың үйлесімді жарасуымен тамсандырды. Оның соңы Өзбекстанның классикалық және эстрадалық өнер жұлдыздарының концертіне ұласты. Олардың сапында Фарух Закиров сияқты отандық корифейлер, жас та талантты, халық арасында кеңінен танымал, консерватория түлектері Озода Нұрсаидова, Жәнібек Пиязов, Юлдуз Мадатқызы Хуснутдинова жетекшілік ететін жастар хоры, Үлкен театрдың солисі Бекзод Давронов және басқа да көптеген орындаушылар өнерлерін паш етті.     

«Музыкалық білім беру мен ғылымды дамытудың негізгі ағымдары» Халықаралық ғылыми-практикалық конференциясы өз жұмысын Мәскеу, Санкт-Петербор, Тегеран, Беларус, Түркімен, Тәжік және басқа да консерватория ректорларының, музыка әлемінің көрнекті қайраткерлерінің кіріспе баяндамаларымен бастады. Конференцияның терең ғылыми форматында музыкалық білім беру мен ғылымның өзекті мәселелеріне қатысты баяндамалар жасалды.        

Секциялық мәжілістер білім беру мен ғылымның әртүрлі мәселелерін жарыққа шығаруға арналды. Бұл конференцияда “Білім алушылардың тұлғалық өсуі жолындағы эдвайзерлер (Құрманғазы атындағы ҚҰК музыкатану, арт-менеджмент және әлеуметтік-гуманитарлық пәндері факултетінің мысалында)” өнертану кандидаты, профессор Г.Ж. Мұсағұлова баяндама жасады.                                                    

Педагогтар, орындаушылар және ғалымдардың халықаралық диалогы заманауи музыкалық білім төңірегіндегі өзекті мәселелердің шешімдерін табуға үлкен серпін берді.

Қорытындылай келе, музыка әлеміндегі айтулы уақиға болған жиын өз алдына қойған мақсатына жетті деп есептеймін. Құрманғазы атындағы Қазақ ұлттық консерваториясының ұжымы атынан Өзбекстан мемлекеттік консерваториясының ректоры, Өзбекстан Республикасының халық артисі Камолиддин Уринбаевты және аталмыш өнер-білім ордасының ұжымын Өзбекстан мемлекеттік консерваториясының 85 жылдық мерейтойымен құттықтап, толағай табыс, ғылым мен шығармашылық ізденісте сарқылмас шабыт, білім мен өнер жолында зор жетістіктер тілеймін!

Құрманғазы атындағы Қазақ ұлттық консерваториясы Музыкатану, арт-менеджмент, әлеуметтік және гуманитарлық пәндер факультетінің деканы, «Музыкатану және композиция» кафедрасының профессоры, ҚР композиторлар одағының мүшесі, Өнертану кандидаты 

Г.Ж.Мұсағұлова