Консерватория студенті кларнетшілерге арналған «Yamaha Music Gulf» стипендиялық бағдарламасының финалында табысты өнер көрсетті

Консерваториямыздың 3-курс студенті Нұралы Күнғалиев пен ҚР Еңбек сіңірген қайраткері, Үрмелі және ұрмалы аспаптар кафедрасының профессоры Жанат Рахметоллаұлы Ерманов 2023 жылғы ақпанның 10 мен 13 күндері аралығында Дубай қаласында өткен кларнетшілерге арналған «Yamaha Music Gulf» стипендиялық бағдарламасының финалына қатысып қайтты.

Шараның мақсаты – жас талантты орындаушыларды олардың шығармашылық қуатын жүзеге асыруға және олардың кәсіби музыкалық каръерасын одан әрі дамытуға қолдау көрсету арқылы музыкалық мәдениеттің дамуына үлес қостыру.

2022/23 жылы аталған бағдарлама кларнетте орындаушылардың арасында іріктеу шарасын өткізген болатын. Іріктеу мақсатындағы тыңдау қатысушылардың орындауларының бейнежазбасын тыңдау негізінде өткізілді, ал финалдық тыңдаулар 2023 жылдың ақпан айында Дубай қаласында (Біріккен Араб Әмірліктері (БАӘ) өткізілді. Соның нәтижесі бойынша  студентіміз Нұралы Күнғалиев Yamaha Custom YCL-CXE сериясының кларнетіне ие болды.

Стипендиялық бағдарламаға қатысуға: Таяу Шығыс, Батыс Азия, Африка, Армения, Әзірбайжан, Грузия, Қазақстан, Қырғызстан, Молдова, Өзбекстан, Түркіменстан, Украина сияқты әртүрлі аймақтан келген кларнетшілер мүмкіндік алған.

Нұралы Күнғалиев пен ұстазы Жанат Рахметоллаұлы Ермановты лайықты жеңістерімен шын жүректен құттықтаймыз және жаңа шығармашылық табыстарға кенеле берулерін тілейміз!