КОНСЕРВАТОРИЯ ҰЖЫМЫ ПРОФЕССОР, ҚР ЕҢБЕК СІҢІРГЕН АРТИСІ АЙГҮЛ НАРИМАНҚЫЗЫ ҮЛКЕНБАЕВАНЫ МЕРЕЙТОЙЫМЕН ҚҰТТЫҚТАДЫ

Айгүл Нариманқызының еңбек жолы консерваториядан бастау алады. Ол отыз бес жылдан астам уақыт ішінде көптеген шәкірт тәрбиеледі. Домбырашы-ұстаздың шәкірттерінің алды PhD докторы атанып, Құрмет ордені, ҚР еңбек сіңірген қайраткері, Мәдениет саласының үздігі, «Дарын» жастар сыйлығы сынды атақ-марапаттарды иеленсе,  көптеген халықаралық және республикалық байқаулардың жеңімпаздары атанып, дәстүрлі өнерімізді кеңінен насихаттап жүргені қаншама. Айгүл Нариманқызының көп жылдық қажырлы әрі адал еңбегі – Құрманғазы атындағы Қазақ ұлттық консерваториясының тарихында өзіне лайықты орнын алатыны сөзсіз.

Ректор Арман Әділханұлы өз сөзінде: «Сіз – қазақтың күй өнеріндегі осы замандағы үлкен тұлғасысыз, күй атасы Құрманғазы атындағы ұлттық консерваториямыздың мақтанышысыз. Саналы ғұмырыңызды қасиетті күй өнеріміздің сақталуына, бүкіл әлемге паш етіп, насихатталуына, өскелең ұрпақ бойына сіңіруге арнап, аянбай тер төгіп келесіз. 35 жылдан астам еңбек жолыңызды ұлттық өнеріміздің қарашаңырағының беделін биік ұстауға, шәкірт тәрбиелеу ісіне арнадыңыз. Қажырлы еңбегіңіз үшін алғысымыз шексіз!» - деп құрмет білдірді.

Құрманғазы атындағы Қазақ ұлттық консерваториясының ұжымы Айгүл Нариманқызын мерейлі мерейтойымен құттықтап, зор денсаулық, ұзақ ғұмыр, қажымас қайрат, отбасына баянды бақыт, шығармашылық табыстар тілейді!