Консерваторияда 1-курс білім алушыларын студенттер қатарына қабылдау кеші өтті
2023 жылдың 29 қарашасында консерваторияның Е.Рахмадиев атындағы Үлкен концерт залында 1-курс білім алушыларын Студенттер қатарына қабылдау кеші болып өтті.
Англиялық танымал жазушы Джоан Роулингтің сиқыршылар әлемі жайлы романдар сериясына негізделген аталмыш кешке қатысқан өнер-білім ордасының оқытушылары мен студенттері, консерватория табалдырығын биыл ғана аттаған студенттер мерекесінің қызықты өтуіне зор үлестерін қосты.
Әйгілі романның мазмұнында Хогвартс Мыстандар мен Сиқыршылар мектебінің оқушысы Гарри Поттер және оның достары Роналд Уизли мен Гермиона Грейнджерлердің бастан кешкен оқиғалары туралы айтылатындығы, оқиғаның мақсаты зұлым сиқыршы Лорд Волдемортты жеңу болып табылатындығы бәрімізге мәлім. Әлемге танымал туынды желісін айтулы кешке негіз етіп алған ұйымдастырушылар оны музыка әлемімен шебер байланыстыра отырып, көрерменді тәнті еткен қызықты да тартымды қойылым етіп шығарды.
Қиял-ғажайыппен қоса, жанрлардың көптеген түрлері кездесетін бұл шығарма 1-курс Студенттер мерекесіне арқау болып қана қоймай, тылсымға толы дүние мен музыка құдіретінің тым жақын байланыста екендігін тағы бір дәлелдегендей болды.
