Консерваторияда «Қазақстанның халық әртісі» атағын иеленген ұстаздарға құрмет көрсетілді

Бүгін Құрманғазы атындағы Қазақ ұлттық консерваториясының мәжіліс залында Президентіміз Қ.К.Тоқаевтың Жарлығымен «Қазақтанның халық әртісі» атағына ие болған әріптестеріміз, өнер-білім ордасының ұлағатты ұстаздары, ұлттық өнердің дамуына үлкен үлес қосып жүрген – күйші-ұстаз, «Домбыра» кафедрасының профессоры Үлкенбаева Айгүл Нариманқызын, әнші-ұстаз, «Халық әні» кафедрасының доценті Стамғазиев Рамазан Өмірәліұлын және опера әншісі, «Вокалдық өнер» кафедрасының аға оқытушысы Күзембаев Талғат Пердебекұлын консерватория ректорының міндетін уақытша атқарушы Әбдірахман Гүлнар Бақытқызы бастаған консерватория ұжымы арнайы құттықтап, марапат иелеріне құрмет көрсетті.

Сонымен қатар 25 қазан – Республика күні мерекесіне орай өнер-білім ордасында шәкірт тәрбиелеу жолында елеулі еңбек үлгісін көрсетіп жүрген ұстаздар мен қызметкерлерге Қазақстан Республикасы Мәдениет және ақпарат министрлігінің марапаттары салтанатты түрде табысталды.

Атап айтсақ, ҚР Мәдениет және ақпарат министрлігінің «Мәдениет саласының үздігі» төсбелгісі «Аспаптық орындаушылық» факультетінің деканы, Философия докторы (PhD) Бекенова Айжан Сләмқызы мен Халықаралық байқаулардың лауреаты, «Қобыз және баян» кафедрасының оқытушысы, өнертану магистрі Нарымбетов Ғалымжан Маратұлына табыс етілсе, Құрмет Грамотасымен Түлкібаева Жұлдыз Жаханшақызы, Халилова Қорлан Маратқызы, Халықова Нұргүл Сәкенқызы марапатталды.

Сондай-ақ ҚР Мәдениет және ақпарат министрінің Алғыс хаты Горячева Татьяна Викторовна, Какежанов Ернар Бердібекұлы, Құдайбергенов Абзал Құттыбайұлы және Қабиден Амангелді Оңғарбекұлына табысталса, еселі еңбек етіп жүрген бірқатар оқытушылар мен қызметкерлер консерватория ректорының Алғыс хатын иеленді.

Әріптестерімізді марапаттарымен шын жүректен құттықтаймыз!