Консерваторияда білім күніне арналған салтанатты шара өтті

Бүгін, 2023 жылдың 1 қыркүйегінде Құрманғазы атындағы Қазақ ұлттық консерваториясының Үлкен концерт залында Білім күніне және жаңа 2023-2024 оқу жылының басталуына арналған салтанатты жиын өтті. Бұл консерватория табалдырығын алғаш рет аттап отырған студенттер үшін асыға күткен күннің бірі. Биылғы жылы 281 талапкер білім гранттарын жеңіп алып, өнер-білім ордасының студенті атанды. Оның ішінде 71-і түрлі байқаулардың жүлдегерлері. Бірінші курс студенттерін оқу жылының басталуымен және «Білім күні» мерекесімен шын жүректен құттықтаймыз!

Қазақстан Республикасының мемлекеттік әнұранымен басталған мерекелік шараның алғы сөзі консерватория ректорының міндетін атқарушы Әбдірахман Гүлнар Бақытқызының құттықтауымен басталды. Салтанатты жиында төрт факультет декандары да сөз сөйлеп, студенттерді білім күнімен құттықтап, жаңа оқу жылына сәттілік тіледі. Мерекелік шара жеке орындаушылар мен студенттік ансамбльдердің және хордың қатысуымен ұйымдастырылған концертке ұласты.