Консерваторияда бірқатар құрылымдық бөлімдердің басшылары ауысты
Бүгін Құрманғазы атындағы ҚҰК-да өткен Ғылыми кеңес отырысында ұжым басшысы бірқатар факультет және кафедра басшыларының ауысатынын хабарлады. Консерватория ректоры А. Жүдебаевтың 2022-2023 оқу жылына факультет декандары мен кафедра меңгерушілерін тағайындау туралы бұйрығына сәйкес, «Халық музыкасы» факультетінің деканы Ержан Ерболатұлы Жәмеңкеев өз өтініші бойынша атқарып отырған лауазымынан босатылып, оның орнына факультет деканы етіп профессор Төлепберген Тоқжан, «Аспаптық орындаушылық» факультетінің деканы Жанар Толқымбекқызы Мүсәпірованың орнына доцент, PhD докторы Айжан Ісләмқызы Бекенова тағайындалды.
Сонымен қатар, 2022 жылдың бірінші қыркүйегінен бастап 1 жылға дейінгі мерзімге келесі қызметкерлер кафедра меңгерушісі лауазымына бекітілді: «Арнайы фортепиано» кафедрасының меңгерушісі профессор В.М. Ыбыраеваның орнына оқытушы Ирина Анатольевна Гавриленко, «Жалпы фортепиано» кафедрасының меңгерушісі доцент Игорь Владимирович Олексенконың орнына оқытушы Жанар Толқымбекқызы Мүсәпірова, «Домбыра» кафедрасының меңгерушісі профессор Төлепберген Тоқжанның орнына өнертану магистрі Динара Аманкелдіқызы Нұрбаева, «Қобыз және баян» кафедрасының меңгерушісі профессор Базархан Әбуұлы Қосбасаровтың орнына аға оқытушы, өнертану ғылымдарының магистрі Айгерім Әлімжанқызы Қарсақбаева бекітілді.
Арман Әділханұлы көп уақыт «Қобыз және баян» кафедрасын басқарған ардагер ұстаз, ҚР еңбек сіңірген қайраткері, профессор Базархан Әбуұлына көп жылғы еңбегі үшін алғыс білдіріп, шапан жауып құрмет көрсетті. Сондай-ақ, декан лауазымын босатып отырған Ержан Ерболатұлына да алғыс айтып, сый-сияпат жасап, жаңа қызметке тағайындалған әріптестерін жаңа оқу жылының басталуымен құттықтап, жұмыстарына сәттілік тіледі.
