Консерваторияда «Kazakh Piano Fest - 2023» I Халықаралық фортепиано музыкасы фестивалінің шымылдығы ашылды
2023 жылдың 9 қазанында Е.Рахмадиев атындағы Үлкен концерт залында фортепиано мектебінің негізін қалаушы, Құрманғазы атындағы Қазақ ұлттық консерваториясының профессоры, ҚазКСР еңбек сіңірген артисі, қазақстандық композиторлардың шығармашылығын насихаттаушы Ева Коганның 95 жылдығына арналған «Kazakh Piano Fest - 2023» I Халықаралық фортепиано музыкасы фестивалінің шымылдығы ашылды. Халықаралық фестиваль қазан айының 9-13 аралығында өтеді.
Қазақстанда тұңғыш рет өткізіліп жатқан фестивальдің ашылу салтанатына жобаның көркемдік жетекшісі Ғимарат Ерназар Ғабитұлы, Құрманғазы атындағы Қазақ ұлттық консерваториясының ғылыми-шығармашылық және халықаралық ынтымақтастық жұмыстар жөніндегі проректоры Бегембетова Ғалия Зайнақұлқызы, ҚР еңбек сіңірген артисі, Қазақ ұлттық өнер университеті «Фортепиано» кафедрасының профессоры Құсайынов Алтай Қарпықұлы, сондай-ақ, алыс-жақын шетелдерден арнайы келген қонақтар, атап айтсақ, Нью-Йорк штатындағы Итака университеті музыка мектебінің «Фортепиано» бөлімінің профессоры, Йель университетінің фортепиано өнерінің докторы және шебері Дмитрий Новгородский, Сараджишвили атындағы Тбилиси мемлекеттік консерваториясы «Арнайы фортепиано» кафедрасының меңгерушісі Манана Гоциридзе, Карлсруэ жоғары музыка мектебінің профессоры, Санкт-Петербург қаласындағы Музыка, театр және хореография институтының профессоры Пальмов Вадим Игоревич, фестиваль демеушісі «Bank RBK» коммуникациялар департаментінің директоры Шен Виктория Фу-Чжановна қатысты.
Салтанатты сәтте сөз кезегін алған фестивальдің көркемдік жетекшісі Ғимарат Ерназар Ғабитұлы: «Қазақстан үшін фортепиано фестивалін өткізу бірінші тәжірибе. Сонымен қатар, халықаралық жоба әрбір қатысушы мен тыңдаушының кәсіби мәртебесін арттырады. Іс-шараның бұл ауқымы мәдениеттің дамуына мүмкіндік береді, адамның рухани қазынасын кеңейтеді» деп атап өтті.
«Art Forum of Kazakhstan» Халықаралық шығармашылық ұйымы және Құрманғазы атындағы Қазақ ұлттық консерваториясы ұйымдастырған бес күнге созылатын осынау өнер мерекесі аясында Қазақстан, АҚШ, Ресей, Грузия, Румыния және Германиядан келген фортепиано музыкасының жетекші өкілдері өз өнерлерін көрермен назарына ұсынып, сонымен қатар шеберлік сабақтарын өткізбек.
