Консерваторияда «Кредиттік оқу технологиясы» тақырыбында кураторлық сағат өтті

Бүгін Құрманғазы атындағы Қазақ ұлттық консерваториясының Е.Рахмадиев атындағы үлкен концерт залында 2023-2024 оқу жылындағы 1-курс студенттеріне арналған кураторлық сағат өтті. Кураторлық сағат «Кредиттік оқу технологиясы» тақырыбында өрбіді.

Жиынды Тәрбие және әлеуметтік жұмыс жөніндегі проректор Ешмұханов Мұхамбет Ашхатұлы бастап берді. Сондай-ақ, жиынға ректор міндетін уақытша атқарушы Оқу және оқу-әдістемелік жұмыстар жөніндегі проректор Әбдірахман Гүлнар Бақытқызы және оқу-әдістемелік бөлімінің басшысы Мәшімбаева Айнұр Жақыпәліқызы қатысты.

Гүлнар Бақытқызы студенттерге өнер-білім ордасындағы жалпы оқу үдерісі, кредиттік оқу технологиясы мен мемлекеттік шәкіртақы жөнінде түсіндірме жұмыстарын жүргізді. Ал оқу-әдістемелік бөлімінің басшысы оқу жүйесіне байланысты студенттерді толғандырған барлық сұрақтарға тұшымды жауап берді.

Кураторлық сағат барысында білім алушылар консерваториядағы оқу үдерісімен толық танысып, өздеріне қажетті ақпараттарға қанықты. ЖОО-ның табалдырығын алғаш аттаған білім алушылар үшін мұндай жиындарды өткізу, оларға түсіндірме жұмыстарын жүргізу білім ордасында үрдіске айналған.