Консерваторияда швейцариялық пианист Джозеф-Морис Ведердің шеберлік сыныбы өтті

2023 жылдың 14 сәуірінде Құрманғазы атындағы Қазақ ұлттық консерваториясының Ф. Шопен атындағы камералық залында швейцариялық пианист, «Steinway artist» атағының иесі, Халықаралық конкурстардың лауреаты Джозеф-Морис Ведердің шеберлік сыныбы өтті. Пианист білім ордасындағы «Арнайы фортепиано» мамандығының төрт студентіне жеке сабақ өткізді.

Шеберлік дәріске аға оқытушы Л.А. Акшпекова сыныбының 4-курс студенттері Нигмеджанова Зухра, Төлепова Айнель, аға оқытушы Р.С. Дүйсембаева сыныбында білім алушы 4-курс студенті Құрманқұл Альмира және аға оқытушы Р.З. Ермекова сыныбының 2-курс магистранты Омарова Ажар қатысып, еуропалық маманнан құнды тәжірибе алды.

Шеберлік сабағы аясында әртүрлі жанрдағы шығармалармен жұмыс жүргізілді, оның ішінде И.С. Бахтың полифониялық шығармалары, В.А. Моцарттың Сонатасы, Ф. Листтің Венгер рапсодиясы және Ф. Шопеннің #2 Скерцосы бар. Дәріс барысында Джозеф-Морис әрбір студенттің орындауындағы шығармаларды мұқият, бүге-шігесіне дейін асқан төзімділікпен тыңдай білді. Пианист тыңдаушының дыбыс қарқыны мен бақылауын бағамдай отырып, әуенді сезінуі және қабылдауына ден қойды. Сондай-ақ, Джозеф-Морис сабаққа қатысушыларға әртүрлі сұрақтар қойып, дәрістің ерекше көңіл күйде өтуіне зор ықпал жасап отырды. Тәлімгер тарапынан техникалық ауыртпалықтарды болдырмау мақсатында құнды кеңестер берілді. Дыбыспен жұмыс барысында музыкант сабақ алушыға шығарманың қарқыны жайлы сауалдар қою арқылы қызықты тәжірибе жасады. Сонымен қатар, шығармаларды орындау барысында студенттердің динамикалық және ырғақтық белгілерді қаншалықты нақты түсінгендерін бағалауға пианист аса мән берді.

Нәтижесінде студенттерге дәріс өткізіп, тәлім берген швейцариялық пианист Джозеф-Морис  пианисттердің  жоғары деңгейдегі ынта-ықыластары мен таланттарын атап өтті. 

Біз швейцариялық пианист Джозеф-Морис Ведерге студенттермен жұмыс барысында танытқан асқан ынта-жігері мен кәсіби қарым-қатынасы үшін алғыс білдіреміз. Аталмыш шеберлік сыныбының пайдасы  қатысушылармен қатар тыңдармандар үшін де өте зор тәжірибе болды десек, артық айтпаған болар едік.  

Іс-шара «Dala Classic» музыкалық агенттігінің қолдауымен ұйымдастырылды. Фотограф - Елена Петрова.