Консерваторияда түлектер қауымдастығы өз жұмысын бастады

Құрманғазы атындағы Қазақ ұлттық консерваториясы өз түлектерін өнер-білім ордасының Түлектер қауымдастығына тіркеліп, бірлестік жұмыстарына белсене атсалысуға шақырады. Консерватория сайтындағы «Біз туралы» бөлімнің ішінен «Түлектер қауымдастығы» атты бөлімше ашылып отыр.

Қауымдастықтың негізгі мақсатына еліміздің жетекші музыкалық жоғары оқу орындарының бірі ретінде консерваторияның мәртебесі мен беделін нығайту жатса, ал міндеттеріне түлектердің ЖОО-мен және өзара тұрақты байланысын қамтамасыз ету үшін ҚҰК түлектері туралы мәліметтер банкін құру, сондай-ақ Қазақстандағы және шет елдердегі Консерватория түлектері арасындағы байланысты біріктіру әрі қолдау кіреді.

Аталған бөлімде өнер-білім ордасының атақты түлектері, өнерде өшпес із қалдырған есімдер туралы ақпараттармен таныс бола аласыздар, сонымен қатар «Түлектер қауымдастығына» тіркелуге арналған арнайы анкета да ұсынылған. Барлығыңыздан жаңа құрылымның жұмысын жандандыру үшін атсалысуларыңызды сұраймыз!