Консерваторияда түлектерге диплом табыстау рәсімі өтті
2023 жылдың 30 маусымында Құрманғазы атындағы Қазақ ұлттық консерваториясының Үлкен концерт залында өнер-білім ордасын бакалавриат және магистратура бойынша тәмамдаған түлектерге салтанатты түрде диплом табыстау рәсімі өтті. Айтулы шараға білім ордасының оқытушылары мен бітіруші түлектердің ата-аналары мен туыстары да қатысты.
Салтанатты рәсімнің шымылдығы Құрманғазы атындағы ҚҰК ректорының міндетін атқарушы Әбдірахман Гүлнар Бақытқызының құттықтау сөзімен ашылды. Биыл консерваторияны жалпы саны 254 түлек тәмамдаған болса, олардың 36-сы үздік бітіріп, қызыл дипломға ие болып отыр.
Салтанатты түрде диплом табыстау рәсімін ардагер-ұстаз, ҚР Халық артисі, Мемлекеттік сыйлықтың лауреаты, «Құрмет» орденінің және А.Байтұрсынов атындағы алтын медаль иегері Жаманбаев Базарғали Әжиұлы бастап, «Дирижерлеу» мамандығын иеленген 18 түлекке дипломдарын өз қолымен табыс етті.
Ал, «Вокалдық өнер және Музыкалық білім беру» мамандықтары бойынша өнер әлеміне қадам басқан 35 түлекке диплом табыстау үшін сахна төріне декан, өнертану кандидаты, қауымдастырылған профессор Нүсіпова Айзада Сайфуллақызы көтерілді. Сонымен қатар, факультет деканы «Музыкалық білім беру» мен «Педагогика және психология» мамандықтары бойынша 8, «Музыкатану» және «Композиция» мамандықтары бойынша 7 түлекке дипломдарын табыстады. «Ішекті аспаптар» мамандығы бойынша 16 түлекке дипломды ҚР Халық артисі, «Ішекті аспаптар» кафедрасының меңгерушісі, профессор Мырзабекова Гаухар Құрманбекқызы, ал, «Ұрмалы және үрмелі аспаптар» мамандығын тәмамдаған 20 түлекке көптен күткен дипломдарын ҚР Еңбек сіңірген артисі, профессор Нұралы Таңатар Қоңырұлы табыс етті. Сондай-ақ, өнертану докторы, профессор Өтеғалиева Сәуле Ысқаққызының қолынан да түлектеріміз өз құжаттарын алды. «Арнайы фортепиано» маманы атанған атанған 20 бітірушіге дипломды ҚР Халық артисі, профессор Қыдырбекова Гүлжәмила Ихсанқызы табыстады. Мұнан соң сахна төріне «Арт-менеджмент» мамандығы бойынша диплом табыстау үшін «Музыкатану, Арт-менеджмент, әлеуметтік және гуманитарлық пәндер» факультетінің деканы, өнертану кандидаты, профессор Мұсағұлова Гүлмира Жақсыбекқызы және «Домбыра» мамандығының 53 түлегіне атаулы құжаттарын тапсыруға «Халық музыкасы» факультетінің деканы, профессор, ҚР Мәдениет қайраткері Тоқжанов Төлепберген Төреахметұлы шақырылды.
Сонымен қатар, «Халық әні» және «Қобыз және баян» мамандықтары бойынша 41 түлекке дипломды «Халық әні» кафедрасының доценті, ҚР еңбек сіңірген қайраткері Исатаева Ардақ Бекмұратқызы мен ҚР еңбек сіңірген қайраткері, профессор Қосбасаров Базархан Әбуұлы табыс етті.
Биылғы жылы өнер ордасын магистратура бойын тәмамдаған 30 түлекке дипломдарын консерваторияның Ғылыми-шығармашылық және халықаралық ынтымақтастық жұмыстар жөніндегі проректоры, өнертану ғылымының кандидаты, профессор Бегембетова Ғалия Зайнақұлқызы салтанатты түрде табыстады.
Қазақ өнерінің киелі қарашаңырағы саналатын консерваторияда жоғары біліммен сусындап, ізденіс пен талпыныстың арқасында үлкен өмірге жолдама алып, қанат қаққан түлектерімізге ақ жол, сәт сапар тілейміз! Келешекте де еліміздегі өнер мен білімнің алтын қазығы – Құрманғазы атындағы Қазақ ұлттық консерваториясы талай биік белестерді бағындырып, мол табысқа кенеліп, өз түлектерін жаңа ізденістер мен үлкен жетістіктерге жетелеп, қанаттандыра береді деп сенеміз!
