Консерваторияда V Халықаралық камералық музыка фестивалі өтеді

2022 жылдың 18-22 қарашасы аралығында Құрманғазы атындағы Қазақ ұлттық консерваториясының Е.Рахмадиев атындағы үлкен концерт залында V халықаралық камералық музыка фестивалі өтеді. Бұл фестиваль Алматы шаһарының мәдени өміріндегі маңызды әрі қызықты оқиғаның бірі болмақ.

Біз сіздердің назарларыңызға Қазақстан, Ресей, АҚШ, Австрия музыканттарының қатысуымен өтетін, бароккодан осы заманға дейінгі аралықты қамтитын қызықты бес музыкалық кешті ұсынамыз. Концерт бағдарламасында әлемдік және қазақстандық камералық музыка шедеврлерін дуэттен оркестрге дейінгі ұжымдардың орындауында тыңдайтын боласыздар.

Фестивальдің құрметті қонақтары: Қазақ КСР халық артисі, көрнекті пианист Ж. Әубәкірова; Ресей Федерациясының еңбек сіңірген артисі, Мариин театрының үлкен симфониялық оркестрінің артисі О. Сендецкий; Итака музыка университетінің профессоры Д. Новгородский (АҚШ) ; Линц қаласы Брукнер атындағы Би және актерлік өнер университетінің аға оқытушысы С. Ким (Австрия); Жас контртенор, «Үлкен опера» жобасының қатысушысы М. Широченко (Мәскеу), сондай-ақ Алматыдағы ең дарынды орындаушылар. Фестиваль аясында шеберлік сабақтары және қонақтармен шығармашылық кездесулер өтеді.

Құрметті өнерсүйер қауым, біз сіздерді асыға күтеміз!!!