Консерваторияда Ғ.Жұбанованың 95 жылдығына арналған Республикалық композиторлар конкурсы өтпек
2022 жылдың 11 қарашасы мен 7 желтоқсаны аралығында Құрманғазы атындағы Қазақ ұлттық консерваториясы Ғазиза Ахметқызы Жұбанованың 95 жылдығына орай Республикалық композиторлар байқауын өткізгелі отыр.
Аталмыш байқаудың мақсаты – дарынды композиторларды іздеу, олардың шығармашылығын қолдап, кәсіби шыңдалуына атсалысу. Ал міндеттеріне композиторлық шығармашылықты ынталандыру, композитор мен аудиторияның өзара әрекеттесуі үшін қолайлы жағдай жасау, академиялық және заманауи музыканы насихаттау әрі әлеуетті талапкерлерді өнер-білім ордасына оқуға тарту жатады.
Конкурсқа кәсіби композиторлар, арнайы жоғары және орта музыкалық оқу орындарының білім алушылары шақырылады. Байқауға 18 жастан – 30 жасқа дейінгі үміткерлер қатыса алады.
Байқау екі кезеңнен тұрады:
Бірінші кезең – 11 қарашадан 14 қарашаға дейін, ал екінші кезең – 15 қарашадан 6 желтоқсанға дейін. Жеңімпаздарды марапаттау 7 желтоқсан күніне жоспарланып отыр.
Байқаудың бірінші кезеңі (іріктеу) онлайн форматта өтпек. Оған сапалы аудио немесе бейне жазбаны, сондай-ақ ноталық материалды (pdf форматында) жіберу керек. Материалдарды 10 қарашадан кешіктірмей ұсынған жөн. Іріктеу кезеңінің нәтижелері 14 қарашада Құрманғазы атындағы ҚҰК-ның сайтында жарияланатын болады.
Екінші кезең офлайн форматта өткізіледі. Бұл кезеңде қазылар алқасы іріктеу кезеңінен өткен шығармаларды тыңдайды.
Байқау мына аталымдар бойынша өтеді:
1. Камералық-аспаптық музыка (жеке шығармалар, дуэттер, трио, квартет). Аспаптардың саны төрттен аспауы қажет. Қатысушы ұзақтығы 3 минуттан 7 минутқа дейінгі бір шығарманы ұсына алады.
2. Этникалық немесе акустикалық аспаптарды міндетті түрде қолданатын электронды музыка. Қатысушы ұзақтығы 3 минуттан 7 минутқа дейінгі бір шығарманы (міндетті түрде pdf форматындағы ноталық мәтінді, сондай-ақ аудио немесе бейне жазбаны ұсыну қажет) ұсына алады.
Өтініштер 2022 жылғы 26 қыркүйектен 10 қарашаға дейін қабылданады.
Байқау жеңімпаздарын марапаттау 7 желтоқсан күні 18:00-де консерваторияның Е.Рахмадиев атындағы Үлкен концерт залында өтеді. Жүлделі орындарға ие болған үздік туындылар концерт барысында орындалатын болады.
Жүлделік қор – 950 000 теңге.
Бас жүлде – 450 000 тг;
1 орын – 250 000 тг;
2 орын – 150 000 тг;
3 орын – 100 000 тг.
Байқау үйлестірушілері: Музыкатану және композиция кафедрасының оқытушылары – Татьяна Викторовна Горячева (8-777-017-10-19), Ілияс Сабибуллаұлы Қожабеков (8-701-823-92-67), e-mail: competitionknc@gmail.com.
Жүктеу үшін:
Ақпараттық хат және байқау шарттары
Информационное письмо и положение конкурса