«Музыка теориясы» бойынша Кіші Олимпиада өз мәресіне жетті

21-22 сәуір күндері өнер-білім ордасында «Музыка теориясы» білім бағдарламасы бойынша Кіші Олимпиада мәресіне жетіп, жеңімпаздар анықталды.

Бұл іс-шараның басты мақсаты – жас таланттарды анықтау, кәсіптік бағдар беру, колледждердің теориялық бөлімдерінің студенттерін консерваторияның «Музыкатану» мамандығына тарту. Дәл осы мақсатта шеберлік сағаттары өткізілді.

Дүбірлі додада еліміздің түкпір-түкпірінен жиналған жастар бақ сынасты. Аталмыш шараға ҚР музыкалық колледждерінің 3,4-курс студенттері мен ҚР арнайы музыкалық мектеп-интернаттарының 11,12-сынып оқушылары қатысты. Атап айтсақ, П.Чайковский атындағы Алматы музыкалық колледжі, Павлодар музыкалық колледжі, Шымкент музыкалық колледжі, Атырау музыкалық колледжінің 3 және 4-курс студенттері, сондай-ақ К.Байсеитова атындағы РОМММИ мен А.Жұбанов атындағы РҚОММИ 12-сынып оқушылары өнерлерін ортаға салды.

«Музыка теориясы» бойынша Кіші олимпиадаға «Музыкатану және композиция» кафедрасының доценті, өнертану кандидаты В.А.Шапилов төрелік етті. Одан бөлек қазылар алқасының құрамында «Музыкатану және композиция» кафедрасының меңгерушісі, доцент, доктор PhD М.Т.Қойлыбаева, «Музыкатану және композиция» кафедрасының профессоры, өнертану докторы С.И.Өтеғалиева, «Музыкатану және композиция» кафедрасының доценті, өнертану ғылымдарының магистрі Ғ.Д.Қалымова, «Музыкатану және композиция» кафедрасының доценті, өнертану кандидаты А.С.Нүсіпова және «Музыкатану және композиция» кафедрасының аға-оқытушысы Л.Ш.Газизова болды.

Олимпиада жоғары деңгейде өтті. Қатысушылардың арасынан үздіктердің үздігін анықтау оңайға соқпады. Олар орындаушылық шеберліктерімен білім деңгейлерінің сапалы екендігін дәлелдеді.

Республикалық додада К.Байсеитова атындағы РОМММИ 12-сынып оқушысы Жұлдыз Нұртаева (ұстаздары – Құндақбаева Г.Б., Зобкова А.А) І орынды қанжығасына байлады.

Ал ІІ орынды Шымкент музыкалық колледжінің 3-курс студенті Ирина Ковпак (ұстазы – В.Б.Унчикова), П.Чайковский атындағы Алматы музыкалық колледжінің 3-курс студенті Әсел Муқышева (ұстаздары – Л.Н.Кузнецова, Д.Е.Омашева, И.Н.Яготинцева) және Шымкент музыкалық колледжінің 3-курс студенті Жансая Нартаева (ұстазы – В.Б.Унчикова) қоржындады.

3-орынды Атырау музыкалық колледжінің 3-курс студенті Бақтияр Мұхитов (ұстазы – В.О.Шукенова), Шымкент музыкалық колледжінің 3-курс студенті Бақдәулет Әбдіманап (ұстаздары – В.Б.Унчикова, Е.А.Осипов), Павлодар музыкалық колледжінің 4-курс студенті Дана Тәженова (ұстаздары – Л.М.Чумакова, З.А.Гатина) және А.Жұбанов атындағы РҚОММИ 12-сынып оқушысы Айя Рахимова (ұстаздары – А.М.Бекжігітова, Ж.Қ.Қдырниязова) иеленді.

Дүбірлі дода жас таланттардың бағын сынап, нағыз мықтыларды анықтады. Жеңімпаздар мен олардың ұстаздарын жеңістерімен құттықтап, шығармашылық табыс пен жетістік тілейміз!