Нина Патрушеваны еске алу кеші өтті

26 сәуір күні Алматыдағы Құрманғазы атындағы Қазақ ұлттық консерваториясының Еркеғали Рахмадиев атындағы Үлкен концерт залында Құрманғазы атындағы ҚҰК профессоры, ҚР Еңбек сіңірген Мұғалімі Нина Михайловна Патрушеваны еске алу кеші өтті. 

Кештің құрметті қонағы ретінде шақырылған шәкірті, музыкалық педагог, профессор, Қазақстанның Еңбек Ері, кеңестік және қазақстандық әйгілі скрипкашы Айман Қожабекқызы Мұсақожаева Нина Михайловна туралы жылы естеліктерін ортаға салып, аяулы ұстазының өзінің ғана емес, өзге де шәкірттері үшін де өнердегі Темірқазығы екенін атап көрсетті.

Салтанатты жиынға сондай-ақ белгілі Кеңес және Қазақстан композиторы, музыкатанушы, скрипкашы, профессор, ҚР еңбегі сіңген қайраткер Әнуар Асқаржанұлы Әкбаров та шақырылды. Кеш барысында Құрманғазы атындағы ҚҰК студенттері және Нұр-Сұлтан қаласындағы Қазақ ұлттық өнер университетінің жанындағы музыкалық колледжі мен мектебінің скрипкашы өрендері Ұстаз рухына арнап әлемдік және отандық сазгерлердің туындыларын орындады.