Поляк дирижерінің консерваториядағы шығармашылық күндері
2024 жылғы 19 ақпаннан 23 ақпанға дейін Құрманғазы атындағы Қазақ ұлттық консерваториясында Эрасмус+ академиялық ұтқырлық бағдарламасы аясында Қазақстанға келген поляк дирижері, Краковтағы Кшиштоф Пендерецкий атындағы Музыка академиясының профессоры, доктор (hability) Станислав Кравчинскиймен шығармашылық кездесулер, дәрістер мен шеберлік сыныптары өтуде.
19 ақпанда өткен шығармашылық кездесуге Құрманғазы атындағы ҚҰК ректоры, ҚР Еңбек сіңірген қайраткері Нұркен Нұрғалиұлы Әшіров, оқу және оқу-әдістемелік жұмыстар жөніндегі проректор Г.Б. Әбдірахман, ғылыми-шығармашылық және халықаралық ынтымақтастық жұмыстар жөніндегі проректор Ғ.З. Бегембетова, тәрбие және әлеуметтік жұмыстар жөніндегі проректор М.А. Ешмұханов, факультет декандары, сондай-ақ бірқатар ұстаздар қатысты.
20 ақпанда «Кшиштоф Пендерецкий және оның музыкасы» тақырыбында маэстроның дәрісі өтті. Келесі күндері студенттік оркестрмен және «Оркестрлік дирижерлеу» мамандығы бойынша білім алушылармен С. Кравчинскийдің шеберлік сыныптары жоспарланған.
Жоспарланған іс-шаралар барысында ЖОО қызметінің түрлі бағыттары бойынша тәжірибе алмасу жүзеге асырылады. Екі оқу орны мен олардың талантты музыканттары арасында халықаралық байланыстар орнатуға ерекше назар аударылады. Жас мамандар мен студенттерге академиялық ұтқырлық бағдарламалары арқылы Краковтағы поляк Музыка академиясының танымал музыканттарымен ынтымақтастықта терең тәжірибе алуға мүмкіндік беру мәселелері талқыланады.
Консерватория ұжымы профессор С. Кравчинскийге алғыс білдіріп, екіжақты ынтымақтастықты дамытуға мүдделі екенін жеткізеді.
