Профессор Веслав Делиматпен кездесу

2024 жылғы 21 ақпанда Құрманғазы атындағы Қазақ ұлттық консерваториясы басшылығы Краковтағы Папа Иоанн Павел II университетінен келген (Краков, Польша) құрметті қонақты қарсы алды. Профессор, органист, дирижер, қарымды музыка докторы, шіркеу музыкасы кафедрасының меңгерушісі Веслав Делимат Қазақстанға алғаш рет келді.

Кездесуге ғылыми-шығармашылық және халықаралық ынтымақтастық жұмыстар жөніндегі проректор Ғалия Бегембетова, барлық факультет декандары және халықаралық бөлім басшысы Дамир Уразымбетов қатысты.

Сонымен қатар, кездесуге профессор В. Делиматтың әріптесі К. Пендерецкий атындағы музыка Академиясының профессоры Станислав Кравчинский қатысты. Олар Қазақстанның еңбек сіңірген әртісі, консерватория профессоры Ғабит Несипбаевпен және факультет декандарымен бірлесіп Қазақстандағы орган өнері мен қос оқу орнындағы оқыту әдістемесінің айырмашылықтарын, католик шіркеулерінің шіркеу музыкасындағы органның рөлі туралы талқылады.

Ресми бөлімнен кейін профессор В. Делимат Е. Рахмадиев атындағы үлкен концерт залында студенттер мен оқытушылар үшін «И. С. Бахтың рухани музыкасын орындаудағы органистің рөлі» атты шеберлік сабағын өткізіп, Бах кантаталары туралы шағын дәріс оқыды. Содан кейін ол кейбір студенттерді тыңдап, олардың ойнау әдістеріне қатысты өз ұсыныстарын берді.