Ректор бірінші курс студенттерін білім күнімен құттықтады

Бүгін Құрманғазы атындағы Қазақ ұлттық консерваториясының Е.Рахмадиев атындағы Үлкен концерт залында 1-қыркүйек – Білім күніне орай консерваторияның табалдырығын алғаш аттаған студенттерге арналған білім ордасы басшылығының құттықтау рәсімі және мерекелік концерт өтті.  Салтанатты жиынның шымылдығын консерватория ректоры, ҚР еңбек сіңірген қайраткері Жүдебаев Арман Әділханұлы құттықтау сөзімен ашты. 

Ректор еліміздегі өнердің қарашаңырағы саналатын консерваторияның студенті атанып отырған жастарға өз білімдерін жетілдіріп, өнерлерін шыңдау жолында талмай еңбек етуге, әрқашан шығармашылық ізденісте болуға шақырып, алдағы студенттік өмірлеріне сәттілік тіледі. Ол үшін білім алушыларға өнер-білім ордасында барлық жағдайдың жасалғанын айтты. Бірінші курс студенттерін факультет декандары да құттықтап, әр факультетке қарасты кафедралармен және профессор-оқытушылық құраммен таныстырды.

Мерекелік концерт Қазақстанның еңбек сіңірген артисі, әнші-ұстаз Рамазан Стамғазиевтің орындауындағы әуелеген әнмен басталып, скрипкашылар ансамблі, үрмелі аспаптар ансамблі, студенттік хор сынды ұжымдардың және әртүрлі жеке орындаушылардың қатысуымен жалғасын тапты.

Студенттік өмірдің есігін жаңадан ашқан өнерлі жастарымызға біз де сәттілік тілеп, оқуда озат, өнерде жүйрік болып, консерваториядай өнер-білім ордасының беделін жоғары ұстаңдар демекпіз!