Режиссер Алтынбек Рахметовпен шеберлік сыныбы өткізілді

25 қыркүйекте Құрманғазы атындағы қазақ ұлттық консерваториясының мәжіліс залында «Арт-менеджмент» кафедарсының ұйымдастыруымен жүзеге асырылған «Мен менеджермін» жобасы аясында студенттерге танымал продюсер әрі режиссер Алтынбек Рахметовпен шеберлік сыныбы өткізілді.

Жүздесу барысында белгілі продюсер студенттерге музыкалық жобалардағы арт-менеджер жұмысының маңыздылығы туралы айта келе, өзінің танымал және табысты жобаларымен кеңінен таныстырып, өз тәжірибесімен, музыкалық жобалар продюсерінің қызметі мен арт-менеджерлердің жұмысын ұйымдастырудағы құпиялары және алгоритмдерімен бөлісті.

Танымал продюсер әрі режиссер тарапынан жаңа таланттарды қолдауға деген ұмтылыс студенттерге терең әсер қалдырды. Студенттер іс-шараларды ұйымдастыру ерекшеліктеріне қатысты көптеген сұрақтар қойды. Сонымен қатар, қазіргі таңдағы музыка үрдістерін талқылауға және өнер адамдарын ілгерілетуде әлеуметтік желілердің ықпалына ерекше назар аударылды.

Кездесу соңында кеш қонағы студенттерге білікті маман ретінде кеңестер берді. Сондай-ақ әлеуметтік желілердегі үздік постқа шағын байқау ұсынылды. Ал, жеңімпаздар Астана қаласына танымал «Qazaqstan дауысы» шоуының түсіріліміне қатысу мүмкіндігіне ие болады.