Римский-Корсаков атындағы V Халықаралық үрмелі аспаптар байқауына қатысуға шақырамыз!

2022 жылдың 24-28 қараша күндері Санкт-Петербург мемлекеттік консерваториясында флейта, кларнет, саксофон, валторна, тромбон, бас-тромбон мамандықтары бойынша Римский-Корсаков атындағы V Халықаралық үрмелі аспаптар байқауы өтпек.

Биыл аталмыш байқау Санкт-Петербург консерваториясының 160 жылдығына орай ұйымдастырылып отыр.

Байқаудың мақсаты:

- Үрмелі аспаптарда орындаушылықтың ұлттық мектеп дәстүрлерін сақтау және дамыту;

- Дарынды және болашағынан көп үміт күттіретін жас музыканттарды анықтау, қолдау және көтермелеу;

- Жас өнерпаздардың кәсіби шеберлігі мен орындаушылық мәдениетін арттыру;

- Үрмелі аспаптарға назар аудару және үрмелі аспаптарда орындаудың беделін арттыру;

- Шығармашылық және кәсіби тәжірибе алмасу.

Байқауға Ресей және өзге де шет мемлекеттердің жас орындаушы музыканттары (орта және жоғары музыкалық оқу орындарының студенттері мен түлектері) қатыса алады.

Конкурстық тыңдаулар үш кезеңге бөлінген.

І кезең – іріктеу кезеңі сырттай өткізіледі (бейнежазба бойынша), II және III кезеңдер 2022 жылғы 24-28 қараша аралығында Санкт-Петербург қаласында өткізіледі.

Байқауға төрелік ететін қазылар алқасы ағаш және мыс үрмелі аспаптарда орындаушылық өнер саласындағы жетекші ресейлік және шетелдік мамандардан құралған.