«Сөз өнері» тақырыбында кездесуі өтті

2023 жылдың 1  қарашасында Құрманғазы атындағы Қазақ ұлттық консерваториясының  жатаханасында «Әлеуметтік-гуманитарлық пәндер» кафедрасының бастамасымен «Сөз өнері» тақырыбында студенттермен кездесу өтті. Кафедра оқытушылары жатақханада тұратын түрлі мамандықта білім алушы жастармен сұхбат құрды. 

Кездесудің мақсаты – сөз өнері төңірегінде студенттермен пікір алмасу ғана емес, білім алушыларды қызықтыратын тақырыптарды, толғандыратын мәлеселерді анықтап, алдағы уақытта осы бағытта жүйелі түрде басқосулар өткізіп тұру. Сырсұхбат барысында студенттердің шығармашылық қызығушылықтарын анықтау мақсатында қазақ-орыс тілдерінде, онлайн форматта сауалнама жүргізілді. 

Кафедра меңгерушісі, профессор Әлима Ғафуқызы сөз өнерінің құдіреті жайында айта келе, әдебиеттің сөз өнері ретіндегі өзіндік ерекшеліктері бар екендігін атап өтті. Сонымен қатар, көркем әдебиеттің болмысы мен бітімін, әдеби шығарманың сыры мен сипатын, әдеби дамудың мағынасы мен мәнін байыптайтындығы және оның қоғамдық қызметін, көркем шығарманы талдаудың қағидалары мен тәсілдерін, әдеби жанрлар мен оның түрлерін, өлең жүйелерін, тіл мен стиль, әдеби ағым мен көркемдік әдіс мәселелерін әдебиет теориясынан ғана танып-білуге болатындығы турасында струденттермен кеңінен әңгіме өрбітіп, пікір алмасты.

Сонымен қатар қазақ халқының асыл мұрасы – шешендік сөз үлгілері қарастырылып, олардың тәлім-тәрбиелік маңызына мән берілді. Баяндамашы аға оқытушы Қ.Матжанова студенттермен бірлесе отырып шешендіктің құдіретін анықтауға тырысты. Кездесудің өтуіне консерваторияның студенттік өзін-өзі басқару ұйымы атсалысты.