Шеберлік сыныптарын өткізіп қайтты

Құрманғазы атындағы Қазақ ұлттық консерваториясы «Дирижирлеу» кафедрасының аға оқытушысы, «Музыкалық білім және психология» кафедрасының меңгерушісі, өнертану ғылымдарының магистрі Камила Әбдуәліқызы Есдәулетова мен «Халық әні» кафедрасының оқытушысы, Өнертану ғылымдарының магистрі Қаламқас Махмұтбекқызы Қадырбаева 2023 жылдың 30 қаңтары мен 3 ақпаны күндері аралығында Павлодар облысы, Екібастұз қаласындағы «Естай атындағы балалар музыка мектебі» КМҚК-де «Хор және Вокал» бойынша шеберлік сыныптарын өткізіп қайтты. Қос ұстазды аталған музыка мектебінің директоры Қайратов Архат Қайратұлы консерватория ректорының атына арнайы қызметтік хат жазу арқылы шақыртқан еді.

Шебер-ұстаздар сөз болып отырған білім шаңырағында 31 қаңтар мен 1 ақпан күндері «Вокал» мамандығы бойынша, ал 2 және 3 ақпан күндері «Хорды дирижирлеу» мамандығынан жеткіншек музыканттарға арнап шеберлік сыныптарын өткізді.

Білім алушылар мен ұстаздар қауымын тәнті еткен музыка майталмандары 3 ақпан күні «Естай атындағы балалар музыка мектебі» КМҚК-нің Үлкен залында қорытынды концерт берді. Солайша жоғары шеберлік дәрістерге сусап отырған білімгерлерді де қуантып, шақыртушы тараптың алғысы мен қошеметіне бөленіп қайтты. Өз тарапымыздан ұстаздарға мерейлеріңіз арта берсін, шығармашылық табыстарыңыз мол болсын демекпіз!