«Steinway&Sons» компаниясының өкілдері консерваторияда қонақта болды
«Steinway&Sons» әлемдік деңгейдегі рояль және фортепиано шығаратын компанияның президенті Г. Циммерман мырза және компанияның өңірлік директоры А. Вильхельм мырза жұмыс сапарымен Құрманғазы атындағы Қазақ ұлттық консерваториясында қонақта болды.
170 жылдан астам пернетақталы музыкалық аспаптар өндірушілерінің нарығында табысты жұмыс істеп келе жатқан және ең жоғарғы сапада фортепиано шығаратын «Steinway&Sons» өкілдері Консерватория әкімшілігін орындаушылардың мүмкіндіктерін кеңейтуге, музыканы көркемдеудегі ойларын жүзеге асыруына бағытталған соңғы жетістіктермен таныстырды.
Циммерман мырза атап өткендей, компания кәсіби музыкалық білім беру ұйымдары мен концерттік ұйымдарды ғана емес, сонымен қатар жаңадан қалыптасып келе жатқан музыканттарды да жоғары сапалы құралдарды пайдалану кеңістігіне тартуға мүдделі. "Музыкамен айналысатын балалар өзін-өзі толық көрсету үшін және дыбыс мәдениетімен танысу үшін әлемдік деңгейдегі аспаптарда ойнау мүмкіндігін алуы керек", - деп атап өтті «Steinway&Sons» Президенті. Осы мақсатта компания фортепиано аспаптарының желісін шығарады, олардың бағасы мен сапасының арақатынасы нарықтың осы сегментінде ең жақсы көрсеткіш болып отыр.
Консерватория әкімшілігі өз тарапынан қонақтарды ЖОО-дағы пернетақталы музыкалық аспаптар паркінің жай-күйімен және оны кеңейту мен жаңарту жоспарларымен таныстырды. Тараптар бірлескен шеберлік сыныптары мен шығармашылық конкурстар өткізу, баптаушылардың біліктілігін арттыру, жаңа музыкалық аспаптар мен оларға заманауи дыбыстық қосымшалар сатып алу сияқты бағыттар бойынша ынтымақтастықты жалғастыруға үлкен қызығушылық танытты.
