Студент қатарына қабылдау кеші өтті

Қазан айының 29 күні Құрманғазы атындағы Қазақ ұлттық консерваториясының Е.Рахмадиев атындағы Үлкен концерт залында консерваторияның табалдырығын алғаш аттаған студенттерге арналған білім ордасы басшылығының құттықтау рәсімі және мерекелік концерт өтті.

Қабылдау кеші «Ұлы ғасыр» атты танымал телесериал стилінде болып, өзгеше форматымен көпшілікті таңқалдырды. «Арт-менеджмент» мамандығының 2-курс студенттері басты ұйымдастырушылар ретінде өздерінің ерекше мүмкіндіктерін көрсете білді. Қабылдау рәсімінде консерваториядағы барлық факультет студенттері өнер көрсетіп, көрермендерге қызықты кеш сыйлады.

Салтанатты жиынның шымылдығын консерватория ректоры, ҚР еңбек сіңірген қайраткері Жүдебаев Арман Әділханұлы құттықтау сөзімен ашты. Ректор еліміздегі өнердің қарашаңырағы саналатын консерваторияның студенті атанып отырған жастарға өз білімдерін жетілдіріп, өнерлерін шыңдау жолында талмай еңбек етуге, әрқашан шығармашылық ізденісте болуға шақырып, алдағы студенттік өмірлеріне сәттілік тілеп, ол үшін білім алушыларға өнер-білім ордасында барлық жағдайдың жасалғанын айтты.

Студенттік өмірдің есігін жаңадан ашқан өнерлі жастарымызға біз де сәттілік тілеп, оқуда озат, өнерде жүйрік болып, консерваториядай өнер-білім ордасының беделін жоғары ұстаңдар демекпіз!