«Тәуелсіздікті ту еткен желтоқсаншылар» тақырыбында кураторлық сағат өтті
2023 жылдың 13 желтоқсанында консерваторияның А.Жұбанов атындағы Кіші концерт залында Студенттер және түлектермен жұмыс жасау бөлімінің ұйымдастыруымен «Тәуелсіздікті ту еткен желтоқсаншылар» тақырыбында кураторлық сағат болып өтті. Іс-шараны аталмыш бөлім басшысы Жалғас Ысқақов ашып, жүргізді.
Өскелең ұрпақтың бойындағы патриоттық рухты ояту және насихаттау мақсатында ұйымдастырылған аталмыш кездесуге арнайы қонақ ретінде шақырылған публицист жазушы Талғат Айтбайұлы мен Желтоқсан көтерілісінің қатысушылары Шұғыл Шумақ Бауыржан және Қалелхан Әділханұлы қатысты.
Келелі кездесуде желтоқсаншылар 1986 жылғы оқиғаны үлкен толғаныспен еске алып, көп жылдар бойы жүрек түкпірлерінде сақтаған сол кезеңдердегі тарихи сәттерімен, үзік сырларымен бөлісті. Тағлымды шара барысында бұған дейін еш жерде айтылмаған тың тарихи деректерге кеңінен қаныққан студенттер айтулы іс-шарадан рухтанып, жігер алды. Тарихи оқиғаның куәгерлеріне студенттер қауымы тарапынан сауалдар қойылып, сырлы сұхбат болды.
Шара соңында бүгінде елуді еңсеріп, алпысқа аяқ басқан аға-апалар сол бір зұлмат заманның артта қалғанына шүкіршілік етіп, тәуелсіздіктің баянды, жастардың болашағы нұрлы болуын, бейбіт заманда берекелі ғұмыр кешуін тіледі.
