Тәжікстанның Қазақстандағы мәдениет күндері аясындағы іс-шаралар консерваторияда жалғасын тапты
Бүгін, 29 тамыз күні кәсіби музыка өнерінің қарашаңырағы – Құрманғазы атындағы Қазақ ұлттық консерваториясының А. Жұбанов атындағы концерт залында Тәжікстанның Қазақстандағы мәдениет күндері аясындағы екі ел композиторларының шығармашылық кездесуі болып өтті.
Қос елдің мәдениеті мен өнері арасына алтын көпір болған айтулы шараға Тәжікстан композиторлар одағының төрағасы, Тәжікстан Республикасының Халық артисі, Талабхуджа Сатторов атындағы Ұлттық консерватория профессоры Амирбек Мусаев бастаған шығармашылық делегация, Қазақстан композиторлар қауымдастығының төрағасы, «Құрмет» орденінің кавалері, композитор Артық Тоқсанбаев бастаған еліміздің белгілі композиторлары, Құрманғазы атындағы Қазақ ұлттық консерваториясының басшылығы және «Музыкатану және композиция» кафедрасының оқытушылары қатысты. Келелі жиынның модераторы консерваторияның Ғылыми-шығармашылық және халықаралық ынтымақтастық жұмыстар жөніндегі проректоры Бегембетова Ғалия Зайнақұлқызы болды.
Кездесу барысында Тәжікстан композиторлар одағының төрағасы, Тәжікстан Республикасының Халық артисі, Талабхуджа Сатторов атындағы Ұлттық консерватория профессоры Амирбек Мусаев құттықтау сөз сөйледі. Сондай-ақ, Қазақстан тарапынан Композиторлар қауымдастығының төрағасы, «Құрмет» орденінің иегері, композитор Тоқсанбаев Артық Жарылқасынұлы өз сөзінде музыка өнері екі елдің достығын одан әрі нығайта түсетіндігін атап өтті. Мұнан соң қос тарап композиторлық ұйымдардың ынтымақтастығы туралы меморандумға қол қойды. Шығармашылық кездесуді екі елдің майталман орындаушыларының өнер көрсетуіндегі концерт қорытындылады.
Қазақстан мен Тәжікстан 1993 жылы алғаш дипломатиялық қатынас орнатқаны белгілі. Содан бергі уақыттарда екі ел арасында түрлі салаларда ынтымақтастық келісім-шарттар жасалып, көптеген жобалар іске асырылуда. Өнердің ұлтқа бөлінбейтіндігі ақиқат. Ұлттық өнер қашанда – ұлылықтың белгісі болып қала бермек. Осынау қағидаттар екі бірдей мемлекеттің мәдениет және өнер майталмандары қатысқан аталмыш игі шарада дәлелдене түскендей.
