Tynda.music музыкалық жобасының ұйымдастырушылары консерваторияда
Бүгін 13 ақпан күні Tynda.music музыкалық жобасының ұйымдастырушылары Құрманғазы атындағы Қазақ ұлттық консерваториясында қонақта болды. Музыкалық жоба өкілдерін консерватория қабырғасында Оқу және оқу-әдістемелік жұмыстар жөніндегі проректор Гүлнар Бақытқызы Әбдірахман қабылдады. Кездесуге «Аспаптық орындаушылық» факультеті мен «Музыкатану, арт-менеджмент, әлеуметтік және гуманитарлық пәндер» факультетінің студенттері мен қос факультет декандары Г.Ж. Мұсағұлова мен А.С. Бекенова келді.
Аталған музыкалық жоба туралы айтсақ, Tynda Music – жанды музыка арқылы адамдарды шабыттандыратын және мәдени тұрғыдан ағартатын музыкалық жоба. Жобаның басты мақсаты – классикалық музыканы және әлемдік деңгейдегі музыканттарды қазақстандықтар үшін неғұрлым қолжетімді ету әрі жақындастыра түсу.
Жоба құрылтайшылары 14 ақпан күні Алматы қаласында шаһар тұрғындары мен қонақтарына Tynda.music камералық оркестрінің және арнайы шақыртылған солист, «Грэмми» сыйлығының лауреаты Максим Венгеровтың концертін ұсынып отыр.
Максим Венгеров – әлемдегі №1 скрипкашы. Оның қолында Антонио Страдиваридің керемет скрипкасы құйқылжиды. Маэстро Венгеров әлемдегі ең көрнекті музыканттардың бірі, оның харизмамен және сүйкімділікпен үйлесім тапқан шебер ойыны – көрерменді тәнті етумен келеді. Маэстро ауқымды скрипкалық репертуар жазып шықты, сөйтіп, дыбыс жазу саласында, құрамында екі Grammy, төрт Gramophone Award UK, төрт Edison Award, екі Echo Klassik Award-тың сыйлықтары кіретін бірқатар марапаттарға ие болған.
Концерт бағдарламасында П.И. Чайковскийдің, Ф. Крейслердің және Ф. Мендельсон-Бартольдидің атақты шығармалары әуелейтін болады.
«Біздің мақсатымыз – адамдар мен музыка арасын жалғар көпір болу, тыңдармандарымызды классикалық музыканы күнделікті өмір тынысына айналдыруға шабыттандыру» - дейді, ұйымдастырушылар.
Қайырымдылық жоба аясында Tynda.charity тарапынан Максим Венгеровтің концерті үшін деп 1000 билет бөлінген: Алматы музыкалық мектептеріне 500 және Астана музыкалық мектептеріне 500 билет. Қонақтар консерватория студенттеріне айтулы музыка кешіне рұқсат беретін 150 билетті сыйға тартты.
Проректор Гүлнар Бақытқызы қонақтарға ризашылығын білдіріп, жұмыстарына сәттілік тіледі. Кездесуге қатысқан «Аспаптық орындаушылық» факультетінің студенттері де жоба авторларына шығармашылық табыстар тілеп, сыйға тартылған билеттері үшін алғыстарын жаудырды.
