ЮНЕСКО демеушілігімен The Planet of Art 2023 халықаралық фестивалі өтті
2023 жылдың 29 мамыры мен 7 маусымы аралығында Павлодар және Астана қалаларында ЮНЕСКО демеушілігімен «The Planet of ART 2023 — Жүрегіміз бірлікпен үндессін» V Халықаралық жастар фестивалінің музыкалық циклінің ауқымды Гала-концерттері өтті.
Қазақстандық ЮНЕСКО клубтарының ұлттық федерациясы жыл сайын өткізетін ауқымды фестивальге биыл алты елден: Әзірбайжан, Қазақстан, Қырғызстан, Тәжікстан, Ресей және Өзбекстаннан 42 лауреат жиналды. Олар бес мыңнан астам үміткердің арасынан іріктелді. Вокалдық, аспаптық орындаушылық және хореографиялық өнер бағыттарында дамып келе жатқан жастар өз өнерлерін ортаға салды. (фестиваль бағдарламасы)
Концерттер Ertis Promenade (4 маусым, Павлодар қ.) және Қ. Қуанышбаев атындағы Қазақ мемлекеттік академиялық музыкалық драма театрының (7 маусым, Астана қ.) сахналарында өтті. Бағдарлама фестиваль үшін арнайы жасалған авторлық музыкалық-хореографиялық шығармалардан, сондай-ақ, әлемдік классикалық және эстрадалық музыка жауһарларынан тұрды. Концертте Құрманғазы, А. Мейірбеков, Д. Уразымбетов, Д. Шин және т. б. композиторлардың шығармалары орындалды.
Фестивальдің шығармашылық құрамы Құрманғазы атындағы Қазақ ұлттық консерваториясының білім алушылары, оқытушылары мен түлектерінен құралғанын мақтана айтамыз. Фестиваль мен Гала-концерттің бас қоюшы-режиссері арт-менеджмент кафедрасының доценті, сапа менеджменті секторының басшысы Дамир Уразымбетов, ал дирижерлеу кафедрасының түлегі (А. В. Молодов сыныбы) Винера Қалиева (вокал), қобыз және баян кафедрасының оқытушысы Ғалымжан Нарымбетов (аспаптық жанр), арт-менеджмент кафедрасының докторанты Тоғжан Молдалім (хореография) тәлімгерлер болды.
Бағыттардың кураторлары арт-менеджмент мамандығының студенттері Дильназ Олалимова (4-курс), Ольга Шерер (2-курс), Алмаз Бауыржанов (2-курс) болды.
Гала-концертке алғаш рет құрметті қонақ ретінде ЮНЕСКО-ның Бас директоры Одрэ Азуле ханым келді. Ол өзінің құттықтау сөзінде Қазақстан Ұлттық ЮНЕСКО клубтары федерациясының президенті Болат Ақшолақовқа осы фестивальді ұйымдастырғаны және шығармашылықты ынталандыру және жастарды қолдау жөніндегі міндеттемесі үшін алғысын білдіріп, ұйымның ЮНЕСКО клубының қозғалысы ішіндегі ең белсенді және баға жетпес мүшелерінің бірі екенін атап өтті.
