«Жаһандық әлемнен кейінгі өнер: метадәстүрден метамәдениетке дейін»: Қазақ консерваториясының мерейтойына арналған халықаралық конференция

2024 жылы 2 желтоқсанда Алматыда Құрманғазы атындағы Қазақ ұлттық консерваториясының 80 жылдығына арналған «Жаһандық әлемнен кейінгі өнер: метадәстүрден метамәдениетке дейін» атты Халықаралық ғылыми-практикалық конференция өтеді. Конференция аясындағы секциялардың отырыстары ҚР Ұлттық кітапханасы мен Консерватория залдарында өтеді.

Конференция Консерваторияның, қазақ музыкасының тарихы мен дамуына байланысты өзекті мәселелерді, сондай-ақ метамодерн контекстіндегі музыкалық өнер мен оқыту әдістемелерін талқылау үшін маңызды алаңға айналады. Этникалық және жаһандық, нақты және виртуалды өзара іс-қимыл мәселелері, сонымен қатар қарқынды технологиялық прогресс жағдайында ғасырлық музыкалық дәстүрлерді сақтау пікірталастардың негізгі тақырыптарына айналады. Білім берудегі жаңа үрдістерге және оларды қолданыстағы оқыту жүйелеріне біріктіруге ерекше назар аударылатын болады.

Конференцияға ҚР Мәдениет және ақпарат министрі, Қазақстанның шығармашылық жоғары оқу орындарының ректорлары, ірі мәдениет және ғылым қайраткерлері, ғылыми және білім беру ұйымдарының өкілдері, Ақтау Алматы, Астана, Талдықорған, Тараз, Шымкент, Өскемен қалаларынан келген музыкалық колледждер мен мектептердің педагогтары, сондай-ақ Австрия, Беларусь, Қазақстан, Қытай, Ресей және Өзбекстанның шығармашылық жоғары оқу орындарының оқытушылары мен студенттері қатысады деп жоспарлануда.

Консерваторияның мерейтойы аясында шақырылған шетелдік ғалымдар – Вена музыка және орындаушылық өнер университетінің профессоры Ульрих Моргенштерн және П. И. Чайковский атындағы Мәскеу мемлекеттік консерваториясының профессоры Марина Карасёва мастер-класстарын өткізеді.

Конференция қорытындысы бойынша Қазақстанда кәсіби академиялық және дәстүрлі музыкалық білім беруді дамыту, жаһандық, өңірлік және ұлттық деңгейлерде мәдениеттегі өзгерістерге жедел және шығармашылықпен ден қоюға қабілетті композиторларды, музыкатанушыларды, дирижерлерді, вокалистерді, аспапшыларды және арт-менеджерлерді даярлау жөніндегі ұсынымдармен резолюзия қабылдау жоспарлануда.

Толығырақ ақпарат алу үшін С. М. Шакироваға хабарласыңыз

Тел. +7 727 261-63-64, email: kurmangazyscience@gmail.com

БАҒДАРЛАМАСЫ: https://www.conservatoire.edu.kz/upload/09-2024/programma--na-trekh-yazykakh.pdf