Консерватория жаңалықтары

Құрманғазы атындағы ҚҰК "Ағаш аспаптарының квинтеті" ұжымы өз жетістіктерімен рекордтар кітабына (Қазақстандық ақпараттық энциклопедиялық анықтамалық) енді.
Жуырда "Тұран" университетінде Қазақстан Республикасы Тәуелсіздігінің 30 жылдығына арналған КИНЭС – 2019-2021 Қазақстандық ақпараттық энциклопедиялық анықтамалығының тұсаукесері өтті. Бұл – Қазақстандағы түрлі қоғамдық құбылыстар мен оқиғалардың қалыптасу бастаулары, түрлі рекордтар, қазақстандықтардың жетістіктері жазылған Қазақстандағы алғашқы кітап.
Аталған іс-шараға Құрманғазы атындағы Қазақ ұлттық консерваториясының "Ағаш үрмелі аспаптар квинтеті" ұжымының құрамындағы барлық қатысушылар (жетістіктері кітапқа түскен) шақырылды. Атап айтсақ:
Ерманов Жанат Рахметоллаұлы – ҚР еңбек сіңірген қайраткері, үрмелі және ұрмалы аспаптар кафедрасының профессоры;
Халық Дәуір – үрмелі және ұрмалы аспаптар кафедрасының 1-курс магистранты;
Малимбаева Құралай – үрмелі және ұрмалы аспаптар кафедрасының 4-курс студенті;
Қадырбеков Санжар – үрмелі және ұрмалы аспаптар кафедрасының 4-курс студенті;
Омарова Ақерке – үрмелі және ұрмалы аспаптар кафедрасының 3-курс студенті;
Жоғарыда атттары аталған консерватория профессоры мен студенттері жетістіктерінің Қазақстандық ақпараттық энциклопедиялық анықтамалық рекордтар кітабына енуімен шын жүректен құттықтаймыз! Оларға алдағы уақытта шығармашылық табыстар мен бұдан да жоғары биіктерді бағындыруын тілейміз!

Жақында Нұр-Сұлтан қаласында өткен «Bilim-orkenieti» ұлттық инновациялық ғылыми-зерттеу орталығының ұйымдастыруымен Қазақстан Республикасы Тәуелсіздігінің 30 жылдық мерейтойына орай өткізілген «Қоғам белсендісі – үздік көшбасшы-2021» атты республикалық байқауға консерватория студенті Ермек Теміртайұлы Берекет қатысып, жеңімпаз атанды.

Ермек дипломмен қатар ҚР Жастар саясатының дамуына қосқан үлесі үшін «Қоғам белсендісі – үздік көшбасшы-2021» төсбелгісімен марапатталып, куәлікке де ие болды.

Қуаныш иесінің марапатын оқу ордамыздың ректоры Арман Жүдебаев табыстап, жеңісімен құттықтады. Біз де байқау жеңімпазы атанған Ермек Берекетке өнер биігінде бағындырар белестері көп болуын тілейміз!

Жақында елордамызда өткен «Bilim-orkenieti» ұлттық инновациялық ғылыми-зерттеу орталығы және Үздік студенттер академиясының ұйымдастыруымен Тәуелсіздіктің 30 жылдық мерейтойына орай өткізілген «Қазақстан Республикасының 100 үздік дарынды студенті» атты республикалық байқауда өнер ордамыздың студенті Ерланова Анель Ерланқызы үздіктер қатарынан табылып, І дәрежелі дипломмен марапатталды.

Креативті экономика мен кәсіпкерлік дағдыларды дамытуға бағытталған кәсіпкерлікті дамыту бойынша жоғары оқу орындарына арналған «Creative Spark» білім беру бағдарламасы шеңберінде, сені өз бизнес-идеяңызды ұсынуға және бизнес-идеяңызды коммерцияландыруға әкелетін қолдау алуға мүмкіндік беретін «IDEAFEST-2022» байқауына қатысуға шақырамыз.

Игорь Борисович Лебедев 1937 жылы 15 қаңтарда Мәскеу облысында дүниеге келген. Ол – қазақстандық хормейстер, педагог, профессор. Қазақстан Республикасының білім беру саласының құрметті қызметкері (2003). Қазақ ұлттық музыка академиясының бірінші проректоры (1998-2006). «Парасат» және «Құрмет» ордендерінің иегері.
Музыка мектебін фортепиано класы бойынша бітірген. Алматы мемлекеттік консерваториясын «Дирижерлеу» (хор) мамандығы бойынша бітіргеннен кейін, осы жоғары оқу орнында педагогикалық қызметін бастады. Өзінің еңбек жолын кафедра оқытушысы қызметінен бастап, консерваторияның оқу-тәрбие жұмысы жөніндегі проректоры міндетін (11 жыл) атқарды.
Лебедев Игорь Борисович – ХХ ғасырдағы қазақ музыка мәдениетінің көрнекті қайраткерлерінің бірі. Өзінің кәсіби және қоғамдық қызметі үшін бірнеше рет Қазақ КСР жоғары және арнайы орта білім министрлігінің, ҚР БҒМ, ҚР Мәдениет министрлігінің және т. б. құрмет грамоталарымен марапатталған. И.Б. Лебедевтің ғылыми-зерттеу, оқу-әдістемелік, тәрбиелік және қоғамдық жұмысы Қазақстанда хор мәдениетін және кәсіби хор білімін дамыту мәселелеріне арналған. Оның кәсіби музыканы дамытуға қосқан үлесі шын мәнінде баға жетпес.
Бүкіл өмірін музыка саласына арнаған Лебедев Игорь Борисович 84 жастан асып дүниеден өтті. Марқұмның отбасы мен туған-туыс, бауырлары мен әріптестерінің қайғыларына ортақтасып, көңіл айтамыз. Жатқан жері жайлы, жаны жәннатта болсын!

Бүгін Егемен еліміздің ең ұлық мерекесі – Тәуелсіздіктің 30 жылдығы қарсаңында Құрманғазы атындағы Қазақ ұлттық консерваториясының ректоры Арман Әділханұлы Жүдебаев өнер ордасының ұжымына мәдени және қоғамдық қызметте сіңірген еңбектері үшін мемлекеттік наградаларды табыс етті. Арман Әділханұлы алдымен ҚР Мәдениет және спорт министрі Ақтоты Рахметоллақызының қолынан «ҚҰРМЕТ» орденін алған «Домбыра» кафедрасының профессоры Үлкенбаева Айгүл Нариманқызы мен «Халық әні» кафедрасының доценті Байбосынова Ұлжан Мәліқайдарқызын, «ЕРЕН ЕҢБЕГІ ҮШІН» медалімен марапатталған «Әлеуметтік-гуманитарлық пәндер» кафедрасының профессоры Сатыбалдина Тамара Мухамедиярқызы мен осы кафедра доценті Алтайбаева Шолпан Жүсіпбайқызын жоғары наградаларымен арнайы құттықтап, басқа мемлекеттік наградаларды өз қолымен табыстады.

«Art Forum of Kazakhstan» және Құрманғазы атындағы Қазақ ұлттық консерваториясы Қазақстан Тәуелсіздігінің 30 жылдығы аясында Ева, Иосиф және Семен Коган атындағы I Халықаралық аспаптық орындаушылық байқауын ұйымдастырды.

Бүгін Тәуелсіздігіміздің 30 жылдығы қарсаңында еліміздің саяси, әлеуметтік-экономикалық дамуына қосқан үлесі және белсенді қоғамдық қызметі үшін берілетін жоғарғы деңгейдегі мемлекеттік наградалар табысталды. Құрманғазы атындағы Қазақ ұлттық консерваториясының бірқатар ұстаздары жоғары наградаларға ие болды.
«Әлеуметтік-гуманитарлық пәндер» кафедрасының оқытушылары, профессор Сатыбалдина Тамара Мухамедиярқызы мен доцент Алтайбаева Шолпан Жүсіпбайқызы «Ерен еңбегі үшін» медалімен, «Домбыра» кафедрасының профессоры, ҚР еңбек сіңірген артисі Үлкенбаева Айгүл Нариманқызы мен «Халық әні» кафедрасының аға оқытушысы, ҚР еңбек сіңірген қайраткері Ұлжан Байбосынова «Құрмет» орденімен марапатталды. Консерватория ұжымы көп жылдардан бері аянбай еңбек етіп келе жатқан ардақты ұстаздарды жоғары наградаларымен құттықтап, шығармашылық шабыттарыңыз сарқылмасын дей келе, зор денсаулық, қажымас қайрат тілейді!

Ғылыми-ақпараттық кітапхана қызметі атақты күйші, Құрманғазы Сағырбаевтың шәкірті Дина Нұрпейісованың 160 жылдығына арналған виртуалды көрме дайындады.