Консерватория жаңалықтары

Жақында Құрманғазы атындағы Қазақ ұлттық консерваториясында «Арт-менеджмент» кафедрасының оқытушысы А.Оспанованың бастамасымен және 1 курс студенттерінің атсалысуымен ұлт-азаттық «Алаш» қозғалысының көсемі, қоғам және мемлекет қайраткері, «Алаш» ұлттық-демократиялық партиясының ұйымдастырушысы әрі көшбасшысы Әлихан Бөкейхановтың 155 жылдығына арналған «Тірі болсам қазаққа қызмет етпей қоймаймын» атты ашық сабақ өтті.
    Әлихан Нұрмұхамедұлы Бөкейхан – Ұлт көсемі Алашордадағы алғашқы Қазақ ұлттық үкіметінің басшысы, сондай-ақ, талантты публицист, ғалым, аудармашы.
Ашық сабақ барысында Ә.Бөкейхановтың өмірі, қоғамдық-саяси және ғылыми қызметіне байланысты тақырыптар тереңнен қозғалды. Қазақ зиялылары өкілінің өміріне консерватория жастары үлкен қызығушылық танытып отырғанын атап өткен жөн. Аталмыш іс-шара консерватория жатақханасының Акт залында, офлайн форматында өткен болатын.
Ұлттық рухты көтеруге бағытталған мұндай іс-шаралар жастардың бойындағы патриоттық сезімді оятуға, сонымен қатар ата-бабаларының ұрпақ үшін жасаған ерен еңбектерін бағалауға әрі солардай ерік-жігері мықты, батыл да батыр болуға үндейтіні сөзсіз.

Жуырда Дубай шаһарында өткен «Jumeirah sounds» V халықаралық жастар байқауына Құрманғазы атындағы Қазақ ұлттық консерваториясының түлегі Ильмурадов Самат Довлетбайұлы қатысқан болатын. Өнерімен қазылар алқасын тамсандырып, ең жоғары баға алған түлегіміз байқауда «Cello» номинациясы бойынша «Бас жүлдені» жеңіп алды.
Аталмыш додада бір емес, бірнеше мемлекеттің өнер иелері бақ сынасқан еді. Жалпы сайыс екі айналымнан тұрды. Бас бәйгені қоржындаумен қатар түлегіміз Италияның Венеция қаласына магистратурада білім алуға шақырту алды.
Жеңімпаз Самат Довлетбайұлына әрқашан сәттілік серік болып, еңбегі жанып, жаңа жетістік шыңдарына көтеріле беруін тілейміз.

2021 жылдың 12-14 қараша аралығында Алматыда жасөспірім музыканттарға арналған «Prima Nota Fest» Республикалық байқауы өткен болатын. Еліміздің әртүрлі аймақтарынан келген 9-14 жас аралығындағы 45 оқушы ішекті аспаптар, фортепиано және академиялық вокал аталымдары бойынша бақ сынасты.
Аталмыш байқауда қазылық жасауға Италия елінен «Montecatini OPERA Festival» жобасының Бас директоры Лоренцо Лаварини мен көркемдік жетекшісі Мария Джулия Граццини келген болатын.

Бүгін Құрманғазы атындағы Қазақ ұлттық консерваториясы Диссертациялық кеңесінің шешімімен Тасбергенова Гаухар Қошқарбекқызына «Арт-менеджмент» білім беру бағдарламасы бойынша философия докторы (PhD) дәрежесі берілді. Дипломды ректоры Жүдебаев Арман Әділханұлы табыстады.

Үрмелі және ұрмалы аспаптар кафедрасының оқытушысы Иманбаев Азамат Капуханұлын «БІЛІМ БЕРУДЕГІ ҮЗДІКТЕР – 2021» I Халықаралық кітап басылымының ІІ дәрежелі дипломы және «ҮЗДІК ПЕДАГОГ – 2021» медалін иеленуімен шын жүректен құттықтаймыз!

2021 жылдың 28-29 қазанында Уфа мемлекеттік өнер институтында (Башқұрстан, Ресей,) Шаляпин залының 165 жылдығына арналған «Романтические миниатюры в Дворянском собрании» атты әртүрлі мамандықтағы музыканттарға арналған фортепиано курсы бойынша халықаралық фестиваль-конкурсы өткен болатын. Аталмыш байқауда консерваториямыздың студенттері жоғары нәтиже көрсетті.

Қазақстанның Халық артисі, Мемлекеттік сыйлықтың иегері, дәулескер күйші, дирижер, композитор Қаршыға Ахмедияров атындағы «Күй-Ұран» Халықаралық жеке домбырашылар және халық аспаптарында орындаушылар байқауының жүлдегерлері жарияланды.

Тәрбие және әлеуметтік жұмысы жөніндегі проректорының м.а. Ешмуханов Мұханбет Ашхатұлы тәрбие жоспарына сәйкес 1-курс студенттерімен «Жастар арасында құқық бұзушылықтың алдын алу» тақырыбында кураторлық сағатын өткізді. Сонымен қатар, жиынға қатысқан қонағымыз, Алматы қаласының Бостандық ауданы бойынша ювеналды полиция қызметкері, полиция капитаны Аманқұлова Тұрсынкүл Серғазықызы сөз алып, жастар арасындағы құқық бұзушылықтардың түрлерімен таныстырып, заң тұрғысында түсіндіру жұмысын жүргізді. Кураторлық сағат барысында полиция қызметкері студенттердің сұрақтарына тұшымды жауаптарын берді.