Консерватория жаңалықтары
Құрманғазы атындағы Қазақ ұлттық консерваториясында 16-19 мамыр аралығында «MusiQuE - Music Quality Enhancement» халықаралық аккредиттеу агенттігінен келген комиссия құрамы өнер-білім ордасын бакалавриат оқу бағдарламасы бойынша аккредиттеу (1 цикл) үшін сараптамалық жұмыстарын жүргізіп, 19 мамыр күні өз қорытындыларының алғашқы нәтижелерін жария етіп, аккредиттеудің толық нәтижесі үстіміздегі жылдың қазан-қараша айларында белгілі болатынын мәлімдеді.
Құрманғазы атындағы Қазақ ұлттық консерваториясы Студенттер және түлектермен жұмыс жасау бөлімінің басшысы Ысқақов Жалғас Жанысұлы ҚР Президенті Қасым-Жомарт Тоқаевтың «Жаңа Қазақстан жаңару мен жаңғыру жолы» атты Қазақстан халқына жолдауын кеңінен насихаттау мақсатында ҚР «Bilim-orkenieti» ұлттық инновациялық ғылыми-зерттеу орталығының ұйымдастыруымен өткен «ҚР еңбек озаттарының алтын кітабы» атты Республикалық патриоттық байқауына қатысып Мәдениет және өнер саласының дамуына қосқан үлесі үшін «Қазақстан Республикасының Еңбек озаты» атты төсбелгісімен және І дәрежелі дипломымен марапатталды.
18 мамыр күні Құрманғазы атындағы ҚҰК А.Жұбанов атындағы концерт залында «Баян музыкасының кеші» өтті. Концерттік бағдарламада классикалық туындылар және халық музыкасы орындалды. Атап айтсақ, И.С.Бах, В.Золотарев, Ф.Анжелис, Н.Меңдіғалиев, Е.Дербенко, В.Демченко шығармаларымен қатар, А.Гайсин, Д.Тұяқбаев, В.Демченколар өңдеген қазақтың ән-күйлері орындалды.
18 мамыр күні консерваторияның Е.Рахмадиев атындағы Үлкен концерт залында Еуропадан келген қонақтарымыз – «MusiQuE - Music Quality Enhancement» халықаралық аккредиттеу агенттігінен арнайы келген комиссияға арналған «La Primavera» атты концерттік кеш өтті.
16-17 мамыр аралығында Құрманғазы атындағы ҚҰК Мобайл университетінің профессоры, Музыка ғылымдарының докторы және «Steinway» артисі Қадиша Оңалбаеваның шеберлік сыныптары болып өтті.
2023 жылдың 16 мамырында Құрманғазы атындағы ҚҰК профессорлық-оқытушылық құрамының кәсіптік бағдар жұмыстары аясында ҚР еңбек сіңірген артисі, «Қобыз және баян» кафедрасының профессоры А.М.Гайсин, «Арнайы фортепиано» кафедрасының аға оқытушысы, өнертану ғылымдарының магистрі Л.А.Ақышпекова, «Үрмелі және ұрмалы аспаптар» кафедрасының оқытушысы, өнертану ғылымдарының магистрі Т.А.Сапабеков Талдықорған қаласындағы К.Байсейітова атындағы музыкалық колледжге барып, өнер-білім шаңырағының түлектері мен студенттерін консерваторияның тарихымен, музыкалық орындаушылықтың бастауында тұрған қазақстандық өнер және мәдениет саласының майталмандарымен жете таныстырып қайтты.
2023 жылғы 16 мамыр күні Құрманғазы атындағы Қазақ ұлттық консерваториясында талапкерлерді консерваторияда білім алудың түрлі бағыттары бойынша қабылданудағы ақпараттармен, сондай-ақ, білім беру бағдарламаларымен таныстыру мақсатында «Вокал, дирижерлік және музыкалық білім беру» факультетінің онлайн «Ашық есік күні» тікелей эфирі өтті.
2023 жылдың 16 мамырында кәсіптік-бағдар беру іс-шаралары аясында «Аспаптық орындаушылық» факультетінің профессорлық-оқытушылық құрамы арнаулы орта білім беру мекемелері мен мамандандырылған музыкалық мектеп түлектеріне, сондай-ақ, болашақ магистранттар мен доктаранттарға Ашық есік күнін өткізді.