Консерватория жаңалықтары

2024 жылдың 1 сәуірінде Е.Рахмадиев атындағы Үлкен концерт залында «Халық музыкасы» факультеті «Халық әні» кафедрасының ұйымдастыруымен әнші-ақын, халық композиторы Кенен Әзірбайұлының 140 жылдығына арналған «Алатаудың ақиығы» атты ән-күй кеші болып өтті.

2024 жылдың 1 сәуірінде А.Жұбанов атындағы концерт залында Құрманғазы атындағы Қазақ ұлттық консерваториясының 80 жылдығына орай «Үрмелі және ұрмалы аспаптар» кафедрасының оқытушысы Сағымбаева Айман Жұмабайқызы сыныбының «Гобой музыкасының кеші» концерті болып өтті. Концерттік бағдарлама барысында Досымжан Аубакиров, Жанар Еленова, Барақ Тәджіғали, Нұржан Майлы өнер көрсетіп, Қ.Шілдебаев, Е.Күмісбеков, Е.Үсенов, С.Абдинұров, Ф.Дивиен, Г.Гендель, А.Паскулли, Р.Штраус сынды композиторлардың шығармалары орындалды.
Фортепиано партиясы – Халықаралық және республикалық байқаулардың лауреаты Баян Болжирова.

2024 жылғы 3-30 наурыз аралығында Құрманғазы атындағы Қазақ ұлттық консерваториясы 2024 жылғы оқуға студенттерді Қабылдау науқаны қарсаңында өзінің жетекші оқытушыларын оқу-әдістемелік көмек көрсету және жоғары оқу орнын таныстыру мақсатында еліміздегі өңірлік музыка колледждері мен өнер колледждеріне жібере отырып, кең ауқымды кәсіптік бағдарлау акциясын іске асырды.

  

Көрнекті композитор Сыдық Мұхамеджановтың туғанына 100 жыл толуына орай Наурыз мейрамының қарсаңында Өскемен қаласындағы «ШҚО филармониясы» кәсіпорнының көрермендер залында «Айсұлу» операсының қойылымы өтті.
Аталмыш қойылымда басты рөлді сомдауға арнайы шақыртылған Құрманғазы атындағы Қазақ ұлттық консерваториясы «Вокалдық өнер» кафедрасының 3-курс (аға оқытушы Т.Бекназарова сыныбы) білім алушысы Данияр Айткужинов Серке бейнесін сәтті алып шығып, көрерменді өнерімен тәнті етті.

2024 жылдың 8-12 сәуірін аралығында консерваторияда алғаш рет «Музыкалық өнер мен білім берудегі тұлға, дәстүр, мәдениет» атты ғылым апталығы өтпек. Ауқымды іс-шара аясында «Креативтік экономика. Заманауи нарықта өнер өнімдерін жылжыту» атты Science Café өтеді.

 

Консерватория қабырғасында «Музыкалық өнер мен білім берудегі тұлға, дәстүр, мәдениет» атты ғылым апталығы аясында Евгений Слесарьдың екі бөлімнен тұратын «Өнертанудағы ғылыми зерттеу траекториясы» атты ашық дәрістері, сондай-ақ ғылыми семинар өтеді. Сонымен қатар, ғалым 12 сәуірде өтетін консерваторияның халықаралық конференциясында «Драмалық қаһарман және тарих: субъективтілік шекаралары» атты баяндама жасайды.

Консерватория оқытушылары — Айжан Бекенова, Камила Есдәулетова, Әйгерім Оспанова және Баян Игілік конкурстан сәтті өтіп, қазіргі таңда Libera Accademia di Belle Arti di Firenze (Флоренция, Италия) жоғарғы оқу орнында, 4 наурыз 31 мамыр аралығында тағылымдамаға қатысуда.

Консерватория доценті Раушан Малаева конкурстан сәтті өтіп Akdeniz Üniversitesi Hastanesi (Анталья, Турция) жоғарғы оқу орнында, 4 наурыз 31 мамыр аралығында тағылымдамадан өтуде.

2024 жылдың 29 наурызында консерваторияның Ғ. Жұбанова атындағы камералық залында күйші-ұстаз, профессор Карима Сахарбаеваның «Күй керуенінің күймелі кірешілері келешекке...» атты сыныптық концерті өтті. Концерт бағдарламасы бойынша көне және сирек орындалатын күйлер көпшілік назарына ұсынылды. Концерттік кеште Халықаралық және республикалық байқаулардың лауреаттары: докторант Ә. Алина, магистрант Л. Ақиқат, 1-4 курс студенттері: І. Күзембай, Ж. Жұмагелдиев, Ә. Халидолда, Р. Бұрахан, М. Әзімбаев, Е. Қадыр өнер көрсетті.