Консерватория жаңалықтары

Бүгін Құрманғазы атындағы Қазақ ұлттық консерваториясының А.Жұбанов атындағы кіші концерт залында 2022-2023 оқу жылындағы 1-курс студенттеріне арналған кураторлық сағат өтті. Жалпы кураторлық сағат «Кредиттік оқу технологиясы» тақырыбында өрбіді.

Бүгін Президентіміз Қасым-Жомарт Кемелұлы Тоқаев Қазақстан халқына жылсайынғы жолдауын арнады. Еліміздің даму стратегиясын айқындап беретін маңызды құжатты консерватория басшылығы арнайы тыңдады.

Бүгін Құрманғазы атындағы Қазақ ұлттық консерваториясының Е.Рахмадиев атындағы Үлкен концерт залында 1-қыркүйек – Білім күніне орай консерваторияның табалдырығын алғаш аттаған студенттерге арналған білім ордасы басшылығының құттықтау рәсімі және мерекелік концерт өтті.  Салтанатты жиынның шымылдығын консерватория ректоры, ҚР еңбек сіңірген қайраткері Жүдебаев Арман Әділханұлы құттықтау сөзімен ашты.

Бүгін ҚР Президенті жанындағы «Орталық коммуникациялар қызметі» алаңында Баспасөз конференциясы өтті. ҚР МСМ Мәдениет комитетінің төрайымы Кәрібжанова Роза Самидоллақызы және еліміздегі шығармашылық бағытта кәсіби білім беретін жоғары оқу орындарының басшылары атсалысқан басқосуға консерваториямыздың ректоры Жүдебаев Арман Әділханұлы да қатысты. Конференция тақырыбы «Мәдениет және өнер саласындағы ЖОО оқытушыларының айлығын көтеру туралы» болды. Жиынға қатысушы БАҚ өкілдері, онлайн қосылған азаматтар спикерлерге өз сұрақтарын қойып, тұшымды жауаптарын алды.

Бүгін Құрманғазы атындағы ҚҰК-да өткен Ғылыми кеңес отырысында ұжым басшысы бірқатар факультет және кафедра басшыларының ауысатынын хабарлады. Консерватория ректоры А. Жүдебаевтың 2022-2023 оқу жылына факультет декандары мен кафедра меңгерушілерін тағайындау туралы бұйрығына сәйкес, «Халық музыкасы» факультетінің деканы Ержан Ерболатұлы Жәмеңкеев өз өтініші бойынша атқарып отырған лауазымынан босатылып, оның орнына факультет деканы етіп профессор Төлепберген Тоқжан, «Аспаптық орындаушылық» факультетінің деканы Жанар Толқымбекқызы Мүсәпірованың орнына доцент, PhD докторы Айжан Ісләмқызы Бекенова тағайындалды.

Мәдениет және спорт министрлігі отандық ұжымдар мен мәдениет, өнер қайраткерлерінің шығармашылық жетістіктерін одан әрі дамыту, дәріптеу мақсатында тұңғыш рет UMAI ұлттық сыйлығын тағайындап отыр.

Нұр-Сұлтан қаласында 2022 жылғы тамыздың 24-25 күндері «Адами капитал – жаңа Қазақстан дамуының негізгі ресурсы» тақырыбында Ғылым және жоғары білім-2022 форумы өтіп жатыр. Республикалық форумға консерваториямыздың ректоры Жүдебаев Арман Әділханұлы мен Оқу және оқу-әдістемелік жұмыстар жөніндегі проректор Әбдірахман Гүлнар Бақытқызы қатысуда.

Бүгін, 2022 жылғы тамыздың 22 күні Құрманғазы атындағы Қазақ ұлттық консерваториясының ұжымы Мәжіліс депутаты Елнұр Сабыржанұлы Бейсенбаевпен және Алматы қалалық мәслихатының депутаты Алмат Тұрысбекұлы Қодасбаевпен кездесті.
Жүздесу барысында Мәжіліс депутаты елдегі әлеуметтік-экономикалық ахуалға тоқталып, жиналған қауымды өз тарапынан Үкіметке жасаған ұсыныстарынан хабардар етті. Содан кейінгі әңгіме сұрақ-жауап түрінде өрбіп, консерватория ұжымы көкейлерінде жүрген, түйткілді мәселелерін ортаға салып, «жоғары билікке жеткізілсе» деген сұрақтары мен өтініштерін халық қалаулысының назарына ұсынды. Депутат өз кезегінде айтылған әрбір мәселені түртіп алып, құзырлы орындарға жеткізуге барынша күш салатынын айтты. Сонымен қатар, қазіргі таңдағы еліміздегі қалыптасып отырған әлеуметтік-экономикалық ахуалды ескеріп, сөз етілген мәселелердің әп-сәтте шешіле қалмайтынын ескертіп, сабырлы болуға шақырды.

Бүгін, тамыздың 19 күні Құрманғазы атындағы Қазақ ұлттық консерваториясының А.Жұбанов атындағы кіші залында ҚР Мәдениет және спорт министрі Дәурен Абаев ведомствоға қарасты шығармашылық жоғары оқу орындарының басшылықтарымен және профессор-оқытушылық құрамымен жүздесті. Офлайн және онлайн форматта өткен жиынға Құрманғазы атындағы Қазақ ұлттық консерваториясы мен Т. Жүргенов атындағы Қазақ ұлттық өнер академиясының қызметкерлері офлайн түрде, ал, ел астанасындағы Қазақ ұлттық өнер университеті және Қазақ ұлттық хореография академиясының өкілдері онлайн түрде қатысты.  Кездесу барысында ведомство басшысы аталған оқу орындарының қызметкерлері күтіп отырған жаңалықтармен бөлісіп, өз кезектерінде ЖОО басшылары министрге атқарылып жатқан іс-шаралар және жаңа 2022-2023 оқу жылына дайындық деңгейі жөнінде баяндады.
Министрдің жеткізген соны жаңалығы – еліміздегі шығармашылық бағытта кәсіби білім беретін жоғары оқу орындары ұстаздарының мәртебесінің көтерілгендігі. Демек, жоғарыда аталған төрт  бірдей шығармашылық бағытта білім беретін оқу ордалары ұстаздарының еңбекақысы бұдан былай 3,5 коэффициент бойынша есептелмек, яғни ағымдағы жыл басынан алғанда екі есеге артпақ. Бұл нәтижеге қол жеткізуге Президентіміз Қасым-Жомарт Кемелұлы Тоқаевтың пәрмені, ҚР Үкіметінің басшысы Әлихан Асханұлы мен сала министрінің қолдауы зор ықпалын тигізді. Еліміздегі мәдениет және өнер саласының дамуына зор үлес қосып, шәкірт тәрбиелеп қана қоймай, концерттік-шығармашылық және ғылыми жұмыстарды қатар алып жүрген ұстаздардың еңбегін жоғары бағалап отырған басшыларға сала мамандарының ризашылығы мен алғыстары шексіз.