Консерватория жаңалықтары

Нұр-Сұлтан қаласында 2022 жылғы тамыздың 24-25 күндері «Адами капитал – жаңа Қазақстан дамуының негізгі ресурсы» тақырыбында Ғылым және жоғары білім-2022 форумы өтіп жатыр. Республикалық форумға консерваториямыздың ректоры Жүдебаев Арман Әділханұлы мен Оқу және оқу-әдістемелік жұмыстар жөніндегі проректор Әбдірахман Гүлнар Бақытқызы қатысуда.

Бүгін, 2022 жылғы тамыздың 22 күні Құрманғазы атындағы Қазақ ұлттық консерваториясының ұжымы Мәжіліс депутаты Елнұр Сабыржанұлы Бейсенбаевпен және Алматы қалалық мәслихатының депутаты Алмат Тұрысбекұлы Қодасбаевпен кездесті.
Жүздесу барысында Мәжіліс депутаты елдегі әлеуметтік-экономикалық ахуалға тоқталып, жиналған қауымды өз тарапынан Үкіметке жасаған ұсыныстарынан хабардар етті. Содан кейінгі әңгіме сұрақ-жауап түрінде өрбіп, консерватория ұжымы көкейлерінде жүрген, түйткілді мәселелерін ортаға салып, «жоғары билікке жеткізілсе» деген сұрақтары мен өтініштерін халық қалаулысының назарына ұсынды. Депутат өз кезегінде айтылған әрбір мәселені түртіп алып, құзырлы орындарға жеткізуге барынша күш салатынын айтты. Сонымен қатар, қазіргі таңдағы еліміздегі қалыптасып отырған әлеуметтік-экономикалық ахуалды ескеріп, сөз етілген мәселелердің әп-сәтте шешіле қалмайтынын ескертіп, сабырлы болуға шақырды.

Бүгін, тамыздың 19 күні Құрманғазы атындағы Қазақ ұлттық консерваториясының А.Жұбанов атындағы кіші залында ҚР Мәдениет және спорт министрі Дәурен Абаев ведомствоға қарасты шығармашылық жоғары оқу орындарының басшылықтарымен және профессор-оқытушылық құрамымен жүздесті. Офлайн және онлайн форматта өткен жиынға Құрманғазы атындағы Қазақ ұлттық консерваториясы мен Т. Жүргенов атындағы Қазақ ұлттық өнер академиясының қызметкерлері офлайн түрде, ал, ел астанасындағы Қазақ ұлттық өнер университеті және Қазақ ұлттық хореография академиясының өкілдері онлайн түрде қатысты.  Кездесу барысында ведомство басшысы аталған оқу орындарының қызметкерлері күтіп отырған жаңалықтармен бөлісіп, өз кезектерінде ЖОО басшылары министрге атқарылып жатқан іс-шаралар және жаңа 2022-2023 оқу жылына дайындық деңгейі жөнінде баяндады.
Министрдің жеткізген соны жаңалығы – еліміздегі шығармашылық бағытта кәсіби білім беретін жоғары оқу орындары ұстаздарының мәртебесінің көтерілгендігі. Демек, жоғарыда аталған төрт  бірдей шығармашылық бағытта білім беретін оқу ордалары ұстаздарының еңбекақысы бұдан былай 3,5 коэффициент бойынша есептелмек, яғни ағымдағы жыл басынан алғанда екі есеге артпақ. Бұл нәтижеге қол жеткізуге Президентіміз Қасым-Жомарт Кемелұлы Тоқаевтың пәрмені, ҚР Үкіметінің басшысы Әлихан Асханұлы мен сала министрінің қолдауы зор ықпалын тигізді. Еліміздегі мәдениет және өнер саласының дамуына зор үлес қосып, шәкірт тәрбиелеп қана қоймай, концерттік-шығармашылық және ғылыми жұмыстарды қатар алып жүрген ұстаздардың еңбегін жоғары бағалап отырған басшыларға сала мамандарының ризашылығы мен алғыстары шексіз.

2022-жылдың қыркүйек, қазан айларында Қазақстан Республикасы Мәдениет және спорт министрлігі, Құрманғазы атындағы Қазақ ұлттық консерваториясының ұйымдастыруымен, Алматы қаласы әкімдігінің қолдауымен III Халықаралық «БАРИТОНДАР ШЕРУІ» конкурсы өтпек. Байқау мақсаты: Ұлттық вокалдық өнер дәстүрлерін дамыту, академиялық ән жанрындағы жас дарынды орындаушыларды анықтау және қолдау, қазақстандық музыкалық мәдениет пен әншілік өнердің үздік дәстүрлерін сақтау. Байқауға жоғары музыкалық оқу орындарының студенттері, конкурсқа қатысу кезінде 20 мен 30 жас аралығындағы кәсіби әншілер (баритондар) қатыса алады.

2022 жылғы шілденің 18 күні Құрманғазы атындағы Қазақ ұлттық консерваториясының ректоры Арман Жүдебаев Steinway & Sons Hamburg фабрикасының ТМД, Таяу Шығыс, Африка аймақтары бойынша директоры Антон Вильгельммен және Steinway & Sons компаниясының Қазақстан бойынша ресми дилері Светлана Хельммен кездесті.

Бүгін Құрманғазы атындағы Қазақ ұлттық консерваториясында ректор А. Жүдебаевтың жетекшілік етуімен консерватория басшылығы мен талапкерлерді оқуға қабылдау комиссиясы және оқытушы-профессорлар құрамы қатысқан жиын болып өтті. Сондай-ақ, жиынға «Саналы ұрпақ» Республикалық жобалық кеңсесінің басшысы Қайыржан Ахметбекұлы Тоқышев және Ұлттық қауіпсіздік комитетінің өкілдері қатысып, атқарылуы тиіс іс-шаралар жөніндегі ой-пікірлерімен бөлісті. Шараның мақсаты – жаңа 2022-2023 оқу жылына жас түлектерді оқуға қабылдау науқанының, емтихандарының барысында туындауы ықтимал түрлі сипаттағы сыбайлас жемқорлық құбылыстарының алдын алу, оларға жол бермеу жолдарын талқылау. Сондай-ақ, бүгінгі таңдағы мемлекеттік құрылымы да, бағыт-бағдары да жаңарып жатқан еліміздегі, соның ішінде ЖОО-дағы, сыбайлас жемқорлықтың алдын алу және онымен күрес жөніндегі мәселелерді сарапқа салу.

Таяуда Құрманғазы атындағы Қазақ ұлттық консерваториясының Музыкатану, арт-менеджмент, әлеуметтік және гуманитарлық пәндер факультетіне қарасты әлеуметтік-гуманитарлық пәндер кафедрасының доценті, Философия ғылымдарының докторы, Қазақстан Республикасының және Ресей Федерациясының педагогикалық ғылымдар кандидаты (PhD) Раушан Байсейітқызы Шыңдауыловаға М.В. Ломоносов атындағы Ресей қоғамдық және фундаментальді ғылымдар академиясының осы Академия Жарғысының негізінде Құрметті Профессор, Құрметті Доктор және Тіркелген Мүше (Академик) атты академиялық атақтары берілді. Ұлттық консерваториямыздың ғана емес, еліміздің атына да зор абырой әкеліп, ғылымға сүбелі үлес қосып жүрген Раушан Байсейітқызын айтулы атақтарға ие болуымен құттықтап, әрқашан еңбегіңіздің жемісін көріп, бергеніңізден береріңіз таусылмай аман жүріңіз демекпіз!

Бүгін Құрманғазы атындағы Қазақ ұлттық консерваториясын бітіруші түлектерге Е.Рахмадиев атындағы Үлкен концерт залында салтанатты түрде дипломдар табысталды. Мемлекеттік әнұранмен ашылған жиын басында іссапарда жүргендіктен шараға қатыса алмауы себепті ректор Жүдебаев Арман Әділханұлының құттықтау сөзі бейнеролик арқылы берілді.

2022 жылғы 30 маусымда сағат 14:00-де (Нұр-Сұлтан қ. уақытымен) Қазақстандағы Creative Spark жоғары білім беру бағдарламасы шеңберінде ұйымдастырылған «СOVID-19 пандемиясынан кейін музыка индустриясын дамыту: Ұлыбритания мен Қазақстан тәжірибесі» атты дөңгелек үстел өтеді.